Karenni Ralkap Le Ṭangṭi Phu Nih Karenni Ramkulh Chung Khuapi 4 An Uk Cang

Karenni ramkulh, Mawchi, Ywathit, Nanmekhon le Mese khuapi cu Karenni ralkap le ṭangṭi phu nih kan uk cang, tiah Karenni Army (KA) ralbawizik Colonel Bone Naing nih RFA ah a chim. Karenni ralkap le ṭangṭi phu nih Nanmekhon, Mawchi le Mese khuapi cu an uk dih cang i Ywathit khuapi tu cu tlawmpalte a taang. SAC ralkap nih Ywathit khuapi ah vanlawng in kahdohnak an tuah lo nain Shiataw le Loikaw khuapi tu ah cun vanlawng in kahdohnak an pehzulh, tiah theih a si.

Hpasawng peng Mawchi hmunram ah SAC ralkap nih an sakhan an chuahtak hnu ah Karenni ralkap nih Mawchi hmunram cu kan uk cang, tiah Karenni Nationalities Defence Force (KNDF) nih nizan January 28 ah an thanh. Karenni Nationalities Defence Force (KNDF) nih cun,”Bawlakhe peng Ywathit khuapi zong kan laak i Ywathit le Bawlakhe khuapi kar meng 12 SAC ralkap sakhan lawng a taang, Shiataw peng zong ah SAC ralkap sakhan pakhat lawng a taang cang”, tiah an langhter.

Loikaw khuapi le Shan ramkulh thlanglei Moebye le Phekhon khuapi lawng ah SAC ralkap nih umhmun an khuar cang, tiah KNDF nih cun an thanh chih. Thawng dang relchap- SAC Ralkap Nih Kum 28 Leng An Rak Um Cangnak Taungoo Pengkomh Sakhan Pathum An Chuahtak, Bago ramṭhen, Taungoo pengkomh ah SAC ralkap nih kum 28 leng an rak um cangnak sakhan pathum an chuahtak hnu ah Karen National Union (KNU) nih hmunram thianhfelnak an ngeihnak kong cu phungning tein an thanh.

Bago ramṭhen, Taungoo pengkomh KNU Brigade 2 hmunram cu SAC ralkap nih an rak chuh mi hna Sah-Kah-Khah 20 kut tang um Khah-Mah-Yah 528 le Khah-Mah-Yah 593 Htinshoe sakhan cu a luancia January 13 ni ah an chuahtak, January 14 ni ah Bosakhee sakhan an chuahtak ṭhan i, January 15 ni ah Soe sakhan zong an chuahtak, tiah theih a si. A luancia January 20 ni ah Karen National Defence Organisation (KNDO) Battalion 4 le Special Brigade phu nih hmunram zohfelnak le tualchung mi ca ah a him lo ding mi thil a chuah lo nakhnga.

SAC ralkap nih a chuahtak mi sakhan 3 ah hmunram thianhfelnak an ngei, tiah theih a si. SAC ralkap Htinshoe sakhan cu KNU Brigade 2 le Brigade 5 ramri hmunram ah a um mi a si i, a chung um SAC ralkap pawl cu thla zeimawzat chung riahcaw pe kho ti lo ding in KNLA le KNDO nih an kham hna hnu ah an chuahtak, tiah theih a si.

Leave a Comment

Leave a Reply

Your email address will not be published. Required fields are marked *