Karenni Revolution Union(KRU) Nih Operation 1107 An Thawk Ni Ah SAC Ralkap 20 Nak Tlawm Lo An Thi

Karenni ramkulh, Mese peng Pantain khua um SAC ralkap sakhan pathum cu opertion 1107 min in kan kah i SAC ralkap 20 hrawng an thi, hriamnam le zen-kuan tampi kan laak, tiah Karenni Revolution Union(KRU) in ṭuanvo ngeitu nih People’s Spring ah a chim. Nihin November 7 ah operation 1107 min in KRU nih Pantain khua SAC ralkap nih umhmun an khuarnak sii-inn le sianginn cu an kah, tiah theih a si.

“Sakhan ngan pakhat ti dah lo a dang sakhan tu cu an laak khawh cang. Pantain khua SAC ralkap sakhan hi a hlan BGF nih umhmun an rak khuarnak a si i ralkap 200 hrawng an um kho, tiin KRU nih an zumh. Tatma 55 nih vanlawng in Battalion pathum tluk ca thazaang an chap. Chaklei hriamtlai ṭangṭi phu thum nih operation 1027 an thawkmi dirkamhnak ah operation 1107 kan thawk ve, tiah KRU nih an langhter.crd- The Chin Post.

Thawng dang: January-November Thla 11 Chung Ah SAC Ralkap Nih Mindat Peng Ah Vanlawng In Bomb 43 An Thlak, Chin ramkulh Mindat peng chung ah SAC ralkap nih 2023 kum hramthawk January thla in November thla tiang ah vanlawng hmang in kahdohnak an tuah i bomb 43 an thlak, tiah theih a si. SAC ralkap nih Mindat peng chung khua 5 telh in hmun 8 ah bomb an thlak i thi le hliam an tam pin ah inn, sianginn le a dangdang a rawkmi zong an tam, saṭil a thimi zong an tam, tiah theih a si.

Mindat peng chung, 2023 thla 11 chung ah SAC ralkap nih vanlawng hmang in kahdohnak tuah in bomb voi 43 a thlak ruang ah sualnak ngei lo tualchung mi 8 an thi, 20 leng hliam an tuar i sianginn telh in minung umnak inn 50 hrawng cu an rawk dih. Cu pin ah tualchung mi ngeihmi motor 1 le motorcycle 7 an ciam i innzuat saṭil zeimawzat zong an thi, pura cheukhat a rawkmi zong an um, tiah theih a si.

SAC ralkap vanlawng bomb thlaknak in Mindat peng chung in thi le hliam kong ah The Mindat Post nih an khawmhsuatmi chung in laakmi a si i atu aa hliammi an langhtermi nakin an tam deuh kho, tiah zumh a si. Chin ramkulh chung ah Mindat peng cu SAC ralkap nih vanlawng hmang in kahdohnak an tuah i bomb thlak a ton biknak hmun ah aa tel vemi peng a si.