Paletwah ah hin zeiruang ah dah hi tlukin nihin ni tiang buainak a chuah peng hnga? Paletwah kong he pehtlaiin keimah ka hmuh ning le ruahnak tlawmpal tein vun langhter ka duh, nan hmuh ning le ruahnak he zong a dan khawh caah ka palh sual ahcun ka ruat thiam te ulaw tiah biatang ka vun i danh hmaisa duh.
Paletwah cu ramri khua asi tikah, ramhnih le ramthum (Myanmar, India le Bangladesh) asimi zong kha fawi tein i pehtlaih khawhnak le chawhleh chawhrawlnak caah attha tukmi hmun hma asi caah, cucu Kawl pawl nih CNA/F pawl hmunhma kan pek hna ahcun, mahbantuk caanttha vialte hi an mah kut ah aum thai sual lai ti kha an rak theih tuk i an phan tuk caah an pek duh hna lo mi asi tiin ka ruah.
Cun Paletwah hi ramri khua asi bantukin tlangcung hriamtlai asimi AA le CNA tibantuk pawl hna ca zong ah Myanmar ramchung ah hin, kawl ralkap kut zongin i hum ven nak ca zongah atthat cemnak hmunhma ah ai tel ve mi asi lai tiah ka ruah. Mah caahcun, Kawl cozah zong nih kan mah tlangcungmi CNA/F le AA zong hmunhma pek duhlo in amah nih humhak peng aduhnak asi ko tiin ka hmuh.
Cubantukin AA pawl zong nih an mah an i ven nak caah siseh, hmailei tiangin an ca hrangah hmunhma ttha asi ti an theih caah nihin ni ah hmunhma an khuarnak hi asi tiin ka hmuh. A ngaingai tiah cun, atubantukin buainak achuah hlan tein hlan lio CNA/F kan pale pawl nih cozah sin ah hmunhma an rak hal hna i an rak pek duh hna lo lio tein khan,
CNA/F kan pale pawl nih khan (anemnak lawng siloin) kan duhnak kha ralttha tein Paletwah cu kanmah Chinram a si, nan kan pek lo cun asi kho lo, mah nan kan pek duhlo ahcun buainak zong achuak tthan kho, cun aherh ahcun kan buai lai/kan i do lai ti hmanh in rak i hrocer in hramhram in rak hal chih kho ve hna sehlaw, an duhnak hmunhma zong an hei pek ko hna hmanh maw,
An pek hna lo hmanh ah zeimawzat tal cu ai thleng kho in atubantukin AA zong nih biatak tein hmunhma lak riangmang in cozah ralkap he i do nak ah hman in le mipi tampi zong nih faaktuk in temtuarnak hna hi a hei um theng lem hnga maw ti hi ka ruat ngaingai. Zeisihmanh ah, Paletwah cu hmunttha, hmunrem asi, kan Chinram asi, khuadawh le khua ngan le khua ropui taktak ah ser khawhmi asi.
Cun hmailei caah kan ram caah hlawknak tampi kan i chuahpi khawh dingmi hmun hma ttha zong asi caah, midang kut i um thai sual lai cu asikhawh bak lo. Cucaah, kan mah ta asi khawh peng nak lai kan Chin mipi dihlak kan i zuam cio ding le ahlei in CNA/F kan pale pawl nih hmai an kan nawrpiak peng ding hi ka duh ngaingai mi asi ve.
Credit: Salai Papum
Leave a Reply