Thantlang Peng Tlanglo khua CNF/A Camp pawng ah Ralkap minung 60 hrawng an phan, Thantlang Peng Tlanglo khua CNF/A Camp pawng ah ralkap minung 60 cu March 10 in an phan cang i Camp lei ah lanh an i tim tiah thawng kan theih. Hi kong he pehtlai in Tlanglo khuami pakhat nih, “March 10 ah kan khua an phan cang.
Kan khua ah zaan khat an riak cang. March 10 CNF lei he tonnak an ngei i kan khua ah an riak. Upa deuh nih an chim ning ahcun atu ni zong Camp lei ah lanh than an i tim an ti. Mah hlan kha minung 30 hawng lawng an si nain atu cu minung 60 hrawng an si,” tiah a chim. CNF/A le Ralkap an i tonnak kong ah CNF upa pakhat nih, “Tonnak ngeih a si ko. Camp ah an ra i tluang tein biaruah a si ko.
Camp tiang an phak ding mi kong hi upa cheukhat nih kan thei lo. Zei ruang ah dah Camp tiang hi an rat ti zong fiang in ka hngal kho rih lo,” tiah a chim. Atu hi Tlanglo khua ah Ralkap le CNF/A lei tonnak an ngeih lio a si i zei kong dah biapi in an ceih khan ti mi hngalh khawh a si rih lo,crd- Democratic Voice of Chin-DVC.
Cadang relchap: Tlanglo ah a caam mi Kawl Ralkap le Dr. Sui Khar atu nai ah an i tong than: Nizan March 10 ah Camp Victoria ah a kal mi Ralkap cu Tlanglo ah an caam i tuIzing March 11 ah Camp Victoria ah kal than an i timh ca ah Dr. Sui Khar Thantlang lei in a rak ra i Tlanglo ah an i tong than tiah thawng kan theih.
Hi kong ah Tlanglo khua upa pakhat nih “Atu nai chun 12:00 ah khan Thantlang lei in Dr. Sui Khar a rak phan i kan khua ah an i tong than. Pu Sui Khar cu a rak men lo. An tih ngai ti a langtuk. Pu Sui nih ‘cunglei ka chawnh cang hna’ a ti hna i an dai. Asinain cunglei nih rak kal than ding in an van ti hna ca ah a si rua. Cucaah Dr. Sui Khar nih ‘Bohmu pakhat le Ralkap pathum nih ka zul u’ a ti hna i atu nai ah khan Tio leiah an tum,” tiah The Hakha Times ah a chim.
Camp Victoria lei in CNA pali an rak kai. Cun Dr. Sui Khar a van zultu pathum nih an zulh hna. Dr. Sui Khar nih “Ralkap Bohmu le a dang pakhat cu a motor ah a thutter hna i a dang pahnih cu motorcycle in an kal,” tiah a chimchap.
Zing ah khan cun kan lungre a theituk nain atu Pu Sui a rat hnu cun kan lungretheihnak a dai, kan thin a phang ti lo, tiah a cunglei upa nih a chim. Ralkap hi nizaan Camp Victoria an kal an kir hnu in tlung lo in Tlanglo ah an caam i khuachung Tualleng Sianginn ah hmunhma an khuar tiah thawng kan theih, crd- the hakha times
Leave a Reply