Mipi ralkap ṭangṭi phu nih Sagaing ramṭhen, Kawlin pengkomh Myanmar Commercial Bank chung tangka Kyats sing 9,000 leng cu NUG Central Bank nih cazin he an fimtawl chungnak kong phungning tein thanhnak an tuah. A luancia November 6 ah Sagaing ramṭhen, Kawlin khuapi cu Kawlin peng hriamtlai phu hrihhawhnak in KIA, PDF, Pah-Kah-Phah le ṭangṭi phu hna nih an rak laak. November 8 ni ah Kawlin pengkomh chung i a biapi bik tiah ruahmi pengkomh ruatkhangtu phu cu NUG, caan karlak zatlang ukhruaitu Central Committee.
Chairman le ramkomh Minister Man Win Khaing Thein nih nawl an chuahmi no. (1/2023) in ṭuanvo an pek hna, tiah theih a si. Kawlin pengkomh ruatkhangtu phu nih SOPs-Standard Operating Procedure zulhphung in an kalpi i Kawlin pengkomh, Myanmar Commercial Bank i tangka Kyats nuai 952.345 cu an kutchung a phanh hnu ah tangka cu NUG caan karlak Central Bank sin ah an ap ṭhan cang. NUG caan karlak Central Bank lei zong nih cazin ning tein tangka cu an fimtawl i.
Myanmar Commercial Bank i tangka a chiami mipi an sungh nakhnga lo tlawttlau lo tein an tawlrel ding kong thanhnak an tuah ve. Crd- The Chin Post. Thawng dang: Ṭiau Camp In A Zaam Mi SAC Ralkap 39 Zokhawthar Palik Sakhan Ah An I Dor. India-Myanmar ramri ah a ummi Rihkhawdar tlangcung i SAC ralkap sakhan le Tio SAC ralkap sakhan cu CNA, CDF-Hualngoram, CDF-Zanniatram le CDF-Thantlang nih an laak i, Ṭiau sakhan in a zaammi SAC ralkap 39 cu Zokhawthar palik sakhan ah an i dor, tiah theih a si.
Sakhan pahnih an lakmi kong he pehtlai in CNA chimnak nawlngeitu Salai Htet Ni nih cun, Rih Sakhan hi November 13 zinglei suimilam 6 hrawng ah an lak i, zanlei suimilam 5 hrawng ah Ṭiau sakhan an lak khawh. Kahdohnak a chuah lio ah SAC lei nih MI 35 an thlah nain vanlawng kahnak ah hliamtuar an um lo, tiah a chim. Ṭiau sakhan in India lei ah SAC ralkap 39 cu an zaam i a zaammi pawl hi India, Zokhawthar palik sakhan ah an hriamnam chiah in an i dor.
Tiah tualchungmi nih an chim. Kahdohnak ah a thimi SAC ralkap ruak 5 tualchung hriamtlai phu nih an char i, Major pakhat tel in ralkap 7 nih hriamnam an chiah, Chin ralkap lei nih hriamnam zeimawzat zong an laak. Sakhan an laak hnu ah hin Mi 35 Helicopter pahnih nih voi 4 kahdohnak a tuah, tiah theih a si. Chin ralkap ṭangṭi phu le SAC ralkap kar kahdohnak ruangah ramri khuate um khua mi hna cu Mizoram lei ah an zaam hna i.
Nizan tiang ah minung 5000 leng India lei ah an lut. Ralzam pawl hi YMA le Desaster Management Authority nih an zohkhen hna, tiah theih a si. SAC nih RPG an kahmi kuan chawkvai i ton sual ruangah tualchungmi pakhat nunnak a liam i, midang pahnih hliam an tuar. Tualchung ralkap lei zong in nunnak a liammi le hliamtuar zeimawzat an um tiah theih a si nain hi kong ah CNA le CDF lei nih thanhnak an tuah mi a lo.
Leave a Reply