PDF Nih Meng 2 Leng A Kap Kho Mi Missile An Ser, NUG tang i Saw Naga hruai mi Southern Drone Team nih drone lawng si loin atu cu Missile zong an ser khawh cang tiah theih a si. Saduhthah ningin tlamtling rih lo hmanh sehlaw a rauh hlan ah tinhmi hmun (target) dik tein a khen kho mi an ser khawh lai tiah zumh a si. Saw Naga nih cun “Tinh mi hmun dik tein a khen kho mi dirhmun cu a si rih lo. A kaptu hna an him nakding ah drone ah kan hman mi control system kan bunh.
Tinh mi hmun dik tein a khen khawh nakding ahcun Ballistic control system bunh a hau rih” tiah RFA ah a chim. Atu i an ser mi hi meng 2 leng tiang an kah khawh. Lamhlat in kah khawh dingin Control System an bunh i duhnak lei poah ah mer khawh dingin Hydraulic system remote an bunh fawn. A chambau mi tete a um len rih i tlamtling tein an ser khawh tik ah cun dohthlennak caah bawmtu ṭha tuk a si lai tiah PDF hruaitu pakhat nih cun a chim.
Guided Missile tiang a phak khawh nakding ah censorship le GPS trigger bunh a herh rih. Cucu an bunh khawh ahcun tinh mi hmun kha dik tein a kah khawh cang lai. Hi bantuk hriamnam ṭha ser khawh nakding ah NUG zong nih a herh mi tangka a kawlpiak cuahmah hna tiah RFA nih cun a ṭial. Thawng dang relchap- Chaklei Hriamtlai Unau Thum Nih Tuahmi Operation Kahdohnak Ah Ramri A Lonhmi Cu Kan Kahdoh Ve Hna Lai, Shanram chaklei ah kalpi cuahmahmi chaklei hriamtlai phu unau 3 nih tuahmi 1027 Operation ah kan i tel lai lo.
Nain Wa hmunram ah vanlei siseh vawlei lei in ramri lonh in kan ram chung an luh ahcun kan kahdoh ve hna lai, tiah UWSA nih phungning tein thanhnak an tuah. November 1 ah Wa hriamtlai phu UWSA nih thanhnak an tuah i 1027 Operation kong ah ṭanh hlei ngei in kahdohnak ah an i tel lonak ding zong an langhter chih. Wa ramkulh humhimnak le Wa mipi runvennak kong ah Wa ram chung i vanlei kahdohnak a tuahmi le vawlei lei in kahdohnak a tuah i ramri a lonhmi cu kan kah ve hna lai, tiah an thanhmi ah cun an langhter.
Wa hriamtlai phu nih an thanhmi cu SAC ralkap pawl ralrin an pek hnanak a si. SAC ralkap an ram chung ah lut in kahdohnak an tuah ahcun kah ve ding in timhcia kan si tiin ralrin an pek hnanak a si. Wa hriamtlai phu cu 1027 Operation a kalpi cuahmahmi TNLA, AA le MNDAA he ṭangṭi an si. A unau thum sin ah kahdohnak ah aa tel lo nain ramri lonh in kahdohnak a tuahmi cu ka kahdoh ve hna lai a ti duhnak cu SAC ralkap pawl a tihnawh hnanak a si,” tiah ram chung ah a um i Hluttaw palai hlun a si i ramkhel lei zong a hngal ngaingai mi pakhat nih a chim.
Leave a Reply