Khah!,, ICJ Biaceihnak Ah Kawlram Aiawh Ding A Fiang Kho Rih Lo

ICJ Biaceihnak Ah Kawlram Aiawh Ding A Fiang Kho Rih Lo Genocide he pehtlaih in Kawlram cung ICJ biaceihnak a voi 2 nak cu a ra lai mi September thla hrawng ah ngei dingah ruah a si nain,Kawlram aiawh ding kongah a fiang kho rih lo tiah Global Justice Center, Legal director Mr. Grant Shubin nih a chim.

Phungning ahcun biaceihnak hi a tu thla ni 23 ah ngeih ding a si nain, biaceihnak ah Kawlram aiawh in a hohmanh an rak thlah hna lo bantukin a herhmi thil zong zeihmanh zong kuat a si lo caah a ni thla thial a hau ding phun a si nain atu tiang cu ceih le khiah mi a um rih lo tiah theih a si. Hi kong pehtlaih in Mr. Grant nih- zapi nih kan hngah mi cu biaceih zung nih zeitindah a kalpi lai ti hi a si.

Phungning ahcun biaceih zung nih kaphnih biahalnak le bialehnak a ngeih ding a si. A sinain, atu dirhmun ahcun Kawlram aiawh ding kong he pehtlaih in lung awtam in kan um.Biaceih zung nih caan lak in a hngah lio a si caah September ah tuah ding mi UN General Assembly ah Kawlram kong he pehtlaih in zeitindah biakhiahnak kan tuah lai ti an hngah mi a si men lai. Atu dirhmun ah zapi nih kan hngah mi cu UN general assembly biachahnak hi a si.

Mah biachahnak hnu lawngah thawk khawh ding dirhmun a si.ICJ ah ralhrangbu nih sihni a hlan mi kong zong zeihmanh a fiangfai mi a um rih lo tiah Mr. Grant nih a chim. Organization of Islamic Co-orporation (OIC) chungtel ram 57 aiawh in Gambia nih Kawlram cu Rohingya miphun hna cungah genocide na tuah tiin ICJ ah taza a cuai ruangah 2019 December 10 le 12 ah a voi 1 nak biaceihnak ngeih a si.

Kaphnih nih an chim mi cungah 2020 January 23 ah ICJ nih Kawl cozah cu biatlang 4 he ca lehnak a tuah i, mah ahcun genocide a um lo nak dingah ven ding le an riantuannak cu thla 6 voi 1 ICJ ah pek dingin ti a si.