Khah!,, Ralhrang Kut Ah Biathup Le Hlonh Cangmi Pawl Digital Thilri Cu Ralhrang Kut Ah A Phan Cang Rua

Phone/computer chung biathup le hlonh cangmi pawl fawitein a hmu than khotu digital thilri cu ralhrang kut ah a phan hlah maw, Ralhrang nih nawlngeihnak an lak hlan deuh ah khan Canada ram company pahnih nih Myanmar cozah sinah phone le computer chung i biathup le hlonh cangmi hmanthlak/ca pawl fawitein a hmu than khotu digital thilri a rak zuarh. Cu thilri cu atu hi ralhrang kut ah a phan cang ko rua tiah zumh a si.

Canada company Open Text le Magnet Forensics nih ralhrang nih nawlngeihnak an lak hlan deuh ah khan hi digital thilri hna cu Myanmar cozah sinah a rak zuarhmi a si. Nawlngeihnak an lak hnuah cun kan zuarh ti lo tiah company pahnih nih an chim.

Justice for Myanmar nih a hmuhchuahmi hna kha Lighthouse Reports le Organized Crime and Corruption Project bu nih cipciar deuh in an vun hlathlai chap tikah Myanmar ram phawrhthiarnak le pehtlainak vuanci nih digital thilri tampi a rak cawk bal ti kha an hmuh. Cu a rak cawkmi digital thilri hna lakah Canada company Magnet Forensics sermi Magnet AXIOM le Magnet OXIOM Cloud, cun Open Text sermi EnCase Forensics V8 le EnCase Mobile Investigator hna an i tel.

Hi digital thilti hna nih an riantuan khawhning a sang tukmi a si. Phone/Computer in pakhat le pakhat biathup/holh thup in i kuatmi, fimmi, thuhmi vialte a hmuh khawh, cun na hlonh (deleted) cangmi hmanthlak le ca pawl zong a hmuh than khawh dih. Cu pinah na social media account kha fawitein an luhhnawh (hack) khawh fawn.

Open Text nih cun “Nawlngeihnak an lak hnu in Myanmar he pehtlaihnak kan ngol dih cang. Bawmhnak kan pe ti hna lo. Kan digital thilri zong kha update kan tuah ti lo. Company nih hin Canada cozah nih sipuaizi phihkharnak a tuahmi vialte kan zulh dih ko lai” tiah thanhnak an tuah.

Magnet Forensics zong nih “Myanmar cozah hi tha tein kan ngiatthlai peng ko. Nuhrin covo buarnak a tam chin lengmang cash 2020 i Myanmar palik nih ramchung i an hmanmi software licence kha update tuah ti lo dingin bia kan khiah. Cun zeihmanh kan zuarh ti hna lai lo” tiah an thanh ve.Crd-the chin post.

Leave a Comment

Leave a Reply

Your email address will not be published. Required fields are marked *