Khampat Khuapi Cu A Dihlak In An Laak Khawh Cang

Sagaing ramṭhen, Tamu peng, Khampat khuapi cu nihin ah Kachin ralkap KIA le ṭangṭi phu hna nih an laak khawh dih cang, tiah NUG runvennak vuanci zung nih thawng an thanh. 2023, November 7 ah Kachin Independence Army(KIA), People’s Defence Force (PDF), mipi ralkap Phah-kah-phah le ṭangṭi phu hna nih an laak khawh dih cang. Ṭangṭi phu hna chung ah Tamu pengkomh battalion 2, No.1 ralram hmun hriamngan tlaitu phu, Special war zone battalion 2, CNDF, TDA, RCDF le KNA-Burma hna zong an i tel ve, tiah an langhter.

Kalay-Tamu lamcung ah ummi Khampat khuapi cu November 3 in kah hram an thok cang i nihin November 7 ah an laak khawh dih cang ca ah zohfelnak zong an tuah chih, tiah an langhter. No.1 ralram hmun chung cu C3C timhtuahnak in KIA ralkap bawizik cu bu khat chung lu ah chaih a si i, KIA hriamtlai bawi hna hruainak in PDF battalion hna le Pah-kah-phah hna cu raltuk cawnpiaknak zong a ngeih hna. Kahdohnak kong cu pehzulh in thawng kan thanh ṭhan te lai, tiah NUG runvennak vuanci zung nih an langhter chih.crd- Lungmili Post.

Thawng dang: Myauksee Khua SAC Ralhrang Sakhan An Laak I Ralhrang 9 An Thi, Mipi Ralkap 3 An Nunnak Liam. Sagaing ramṭhen, Kalay peng Myauksee SAC ralhrang palik sakhan cu mipi ralkap nih luhhnawh in an kah i ralhrang 9 an thi tiah, VAKOK – CNDF chungin ṭuanvo ngeitu pakhat nih Yangon Khit Thit ah a chim. November 3, zing suimilaam 6:00 tluk in Kalay peng Myauksee khua ralhrang palik sakhan cu mipi ralkap nih luhhnawh in an kah i November 4 zing ah hlawhtling tein an laak khawh, tiah theih asi.

Kahdohnak hmun ah SAC ralhrang 9 an thi i, mipi ralkap 3 an nunnak a liam ve, tiah VAKOK – CNDF chungin ṭuanvo ngeitu pakhat nih a chim. Myauksee khua ralhrang palik sakhan laaknak in nunnak liammi mipi ralkap 3 hna hi, VAKOK – CNDF in Salai Thawng Tha Cung, RKDF in Ngio Lung le Min Khanh hna an si, tiah an langhter. Kahdohnak ah aa telmi mipi ralkap ṭangṭi phu hna cu VAKOK – CNDF၊ Ranger Kalay Defend Force – RKDF, Kalay pengkomh battalion 4, Kalay PDO le Allied Power Unit ṭangṭi phufonh hna an si, tiah an langhter chih.