Khuabawi 40 Leng Nih An Rian An Chuahtak

Bago ramṭhen, Tayawaddy pengkomh ah August thla le September thla chungah SAC ralkap kuttang um khuabawi 40 leng nih an rian an chuahtak. Cu chung ah Okpho pengchung um khuabawi hna cu an humhimnak ca ah ṭuanvo an lakpiak khawh hna lo ruangah rian a chuakmi an tam, tiah theih a si. Tayawaddy pengkomh chung ah tualchung hriamtlai phu nih SAC ralkap kuttang um khuabawi hna cu atu le tu ti tluk in an kah lengmang hna ruangah thla hnih chung ah khuabawi 40 leng nih an rian an chuahtak.

Khuabawi rian in aa ngolmi hna nih anmah ai a ṭuantu ding ah khuabawi a thar an kawl hmasa, tiah theih a si. “SAC ralkap kuttang ah khuabawi rian a ṭuantu hna nih mipi harnak an pek ah cun kan fimhlawm hna, mipi cung ah harsatnak an pek lo ah cun kan thlah ko hna nain SAC ralkap kuttang rian ṭuantu poh cu dantat ding ah an i tel ṭhiamṭhiam” tiah Tayawady pengkomh PDF battalion 3802 in chim phuannak nawl ngeitu Zaw Kyi nih a chim.

Khuabawi rian a chuahtak mi an tam tikah khualtlawn a duhmi nih khuabawi sin theihpinak ca lak awk a ṭhat ti lo caah palik sakhan tibantuk ah lak a si tawn, cucaah mipi lei in khuabawi nih rian an ngol tikah kan harnak tete zong cu a um ve,” tiah tualchung mi nih an chim. Uknak an lak hnu in Tayawaddy pengkomh chung ah tualchung hriamtlai phu nih SAC ralkap kuttang rianṭuantu khuabawi 70 tluk an fimhlawm cang hna, cu pinah rian a chuahtak mi khuabawi 100 renglo an um cang, tiah tualchung hriamtlai phu nih an chim, crd- The Chin Post.

Thawng dang relchap- Myanmar Ram Zatuak 60 Kan Laak Khawh Cang, Myanmar ram zatuak 60 cu dohthlennak tuahtu tlangcung hriamtlai le PDF nih an uk khawh cang. SAC ralkap headquarters umnak Naypyidaw cu a kap kho ding dirhmun kan phan cang, tiah NUG President Duwa Lashi La nih a chim. Bloomberg Media nih NUG Prseident bia an hal lio ah, “Mizapi nih dohthlennak kan tuahnak kum 2 leng a si cang, tlangcung hriamtlai hna le PDF i bawm in ral an tuk caah hlawhtlinnak nganpi kan hmuh.

Naypyidaw zong a tlerhkhawnh kho ding dirhmun kan phan cang,” tiah a leh hna. Myanmar ram kong tuaktantu mifim thiam le khua ruat kho hna nih SAC nih hin Myanmar ram za tuak 17 lawnglawng an ukpen khawh, tiah an chim ve. September thla chung ah Naypyidaw van ralkap sakhan telh in sakhan kahdohnak atu le tu a chuak. NUG President nih cun, “Tu kum 2023 chung ah SAC ralkap le PDF kar voi thong in kahdohnak a chuak i SAC lei cu sakhan 100 leng an sung.

CDM ralkap 14,000 hrawng zong kan bawmh hna. SAC ralkap chung in ralbawi cheukhat; Brigadier General rank a ngei mi hna zong CDM tuah dingah ceihmainak kan ngei,” tiah a chim. Cu pinah SAC nih Aung San Suu Kyi ngandamnak an zohkhenh ning ah lung a tling lo i, zumh awk tlak an si lonak le Suu Kyi thonginn in a chuah hmanh ah dohthlennak an ngol lai lo ding kong zong NUG President nih cun a chim.