Lebanon ram, Beirut khualipi ah fak taktak in thil voi 2 a puak ruangah a tlawmbik minung 10 an thi pinah minung 100 leng nih hliamhma an tuar i inn thatha tampi a rawk tiah theih a si. A tang bik ah a video tar chih a si.
August 4 zanlei suimilam 6 pm hrawngah a voikhatnak a puak hmasa in minute tlawmpal ah a fak taktak mi a puak nolh tthan tiah Russia News Agency pakhat RT nih a tarlangh. Cu puaknak a um hnu ah mithi ruak 10 cu siizung ah phanpi an si tiah Lebanon’s internal security chief nih Reuter ah a chim.
Cu thil puak ruangah innn hna aa hnin dih tiah theih a si. Lebanon’s National News Agency NNA le Security lei in News hna nih an langhter ningah cu thil cang cu a puak khomi thil an chiahnak Kodong umnak rili kam ah a si tiah an langhter.
Atu lawlawse cu zei ruangah cu thil puaknak a chuak timi, asiloah, Kodong chungah a puak khomi zei bantuk thilri dah an chiah timi theih fiang a si rih lo i zeithil dah a puak timi theihh a si rih lo.
Online ah a larmi video file ning ahcun thil a puaknak hmun in lei khu he meikhu he paa bantukin a thomi hmuh a si i, inn pawl an rawkmi hmuh khawh a si. Beirut khualipi ah a cangmi cu thil puaknak cu kanmah he pehtlaihnak a um lo tiah Israel Defence Force phu nih a chim.
Cu bantukin Lebanon hrambunh Hazbollah hriamtlai hna zong nih kanmah missile kahmi ruangah a si lo tiah an chim ve ti si. Atangah a voikhatnak a puakmi meikhu a tho cuahmah lio ah a voihnihnak fak taktak in a puak tthan lio video zoh chih khawh a si.
Ref: Duwun
Leave a Reply