KIO Chairman Nih Ralrin Peknak Bia A Chim Cang Hih

SAC Nih Tuah Timh Mi Thimnak Ah Mipi I Tel Lo Ding In KIO Chairman Nih Ralrin Peknak Bia A Chim, SAC an nawlngeihnak pehzulh in a hmunh khawh nakhnga kum 2008 phunghrampi chirhchan in thimnak tuah an timh mi ah i tel lo ding in le miphun pakhat le pakhat kar buainak a chuahter khotu Pyituhsit cawlcanghnak ah mipi i tel lo ding in nizan February 5, Kachin dohthlennak kum 63 tlin camtuak an tuah mi biachimnak ah Kachin Independence Organisation (KIO) Chairman, General N’Ban La nih a chim. SAC an sungh hnu zong ah phu khat le phu khat kar ah buainak a chuak kho mi a si caah.

SAC ralkap a dohtu phu khat le phu khat kar ah lung i khahnak le lung i hmuhthiamnak cu a herh ngaingai mi a si i, SAC ralkap nawlngeihnak a um ti lo hnu ah daihnak a chuah khawh ṭhan nakhnga ram mi dihlak nih ṭuanvo kan ngei cio, tiah General N’Ban La nih cun a chim. Kachin Independence Organisation (KIO) zong SAC ralkap a dohtu phu vialte he tonbiaruahnak kan ngei i, hriamtlai in kahdohnak ah aa tel mi phu hna he a herh ning in tonbiaruahnak ngei kho peng ding in timhlamhnak kan ngei.

Cu pin ah a sung cuahmah mi SAC ralkap nawlngeihnak a dongh sin in mipi humhimnak, zalong tein khuasaknak le phungning tein i ukhruainak hna cu papek in kan kalpi hna lai, tiah KIO Chairman nih cun forhfialnak a tuah. Pau dohthlen caan chung ah tualchung hriamtlai phu le mipi lungrualnak, ṭanrualnak thawng in hramhram nawlngeihnak a dihdongh deng cang caah SAC hruaitu hna le SAC ralkap pawl zong an lung a zor ning cu zapi nih hmuh khawh a si ko, tiah General N’Ban La nih cun a chim chap.

Thawng dang relchap- Aungmingalar Motor Dinh Hmun A Kaang I Dawr Khan 10 Hrawng A Ciam, Minung 2 An Nunnak Liam, Yangon ramṭhen, Mingalardone peng, Aungmingalar motor dinh hmun cu nihin February 5 zinglei suimilam 5:05 ah a kaang i motor dinh hmun(car gate) le dawr khan 10 hrawng a ciam, tiah cuka pawng hrawng a um mi hna nih an chim. Win motor gate, Yarzamin gate, Aung kyawzaw gate, mortor ticket zuarnak gate telh in dawr khan 10 an ciam dih, tiah Motor dinh hmun chung a um mi pakhat nih Khit Thit Media ah a chim.

Motor dinh hmun faak tuk in a kanghnak a ruang hi thilri tam tuk dawr khan chung ah a um caah a kangh fah khunnak a si. Zeiruang ah dah motor dinh hmun a kangh ti cu fiang in hngalh a si rih lo. Shwe linyung gate in mei kanghnak hi a chuak i zeitindah mei a chuah cu hngalh a si lo nain fikfa khamnak sii khanghnak in a chuak, tiah tualchung mi cheukhat nih an chim. Mei kangh ruangah minung 2 nunnak a liam i 1 a tlau, tiah theih a si.

Leave a Comment

Leave a Reply

Your email address will not be published. Required fields are marked *