NLD ṭanh Lai langak pawl nih chuah ding si lo, an ti lai. Kan icheu viar lai ti in sonhtarhnak bia an chim lai. Zeicahtiah an chungkhat sahlawh bawi ṭhutdan in ṭumter an siang hrimhrim hna lai caah khin si ko.
CNF hmuitinh zeidah a si? Zei ruangah dah CNA nih hriam an itlaih? Chin miphun hna nih mahte khuakhan lairelnak ingeih khawhnak ding caah si ko. Mahte khuakhan lairelnak kan ngeih khawh taktak tikah cun, hriam kan tlaih lai, kan idin lai i party politics ah cun kan lut lai lo, ti si.
Cuti si ah, CNF nih CNLD caah thanhca a chuah awk si maw? NO! CNLD nih Chinram pumpi dihlak a huap bik rih nain, a huap thlu rih lo. ZCD, ENDP tbk hna an um rih. Tikah, thanhca cu a chuah kun lai maw? Chuah awk bak a si. Zeitindah a chuah kun lai? “Miphun party ah thimfung pe dih uh” ti cun mipi forhfialnak thanhca cu a chuah bak ding si ve.
Miphun party lawngte nih Chin State hlutdaw an tlaih ahcun, Chinram cu mahte khuakhan lairelnak 100% kan co khawh rih lo hmanh ah, 60-80% tal cu hmainawr cia khawh ding a si. CNF tinhmi taktak cu, cucu si ko cu. Mah miphun party nih kan ram hruai i kan miphun caah mahte khuakhan lairelnak tawlrel ding khi si ko cu.
CNF upa pakhat nih a ṭhutdan dirhmun hmunhter duh ruangah hi bantuk zawn i aa aw-aa sual ahcun, an tuanbia aa dawh te lai lo. Kan mino hna an fiim tuk cang. Politics an thei tuk ve cang. An in cuanh ko hna. Keimah sin hmanh ah an zai tuk cang cu. Ralṭha in chuah bak uh. Miphun lungrualnak le ram sersiamnak thawk khawh ding si cang.
CNF/A nih thanhca chuah ruangah zeidah aa hlawk ding um? A tam tuk. Chin Nationalism timi cu CNF nih aa hlinh zungzalmi si nain, a ngai tiah cun, atu CNLD tluk hmanh in hmai an kal kho lo. CNF cu Hakha-Thantlang ta ah ruah zungzalmi si ko.
Cucaah thanhca chuahnak nih a theipar a hei zunte dingmi pawl cu:
1. Kanmah Laimi kan thisa khat Falam leimi vialte nih CNF cungah lungthurnak an ngei ti lai lo. Tikah, CNF ram cu a leng, cung pavuan lawng si loin, a tak chung muru tiang a pil kho cang lai.
2. Hakha, Thantlang, Falam Laimi pawl hmanh Nationalism lei i ifuntomnak ngeih khawh lo tikah, zeitindah kanmah he aa naih bikmi Zomi cu Chin chungah nan va khumh khawh rua hnga. Khi zong khi tu hnu kum 5 cun, an lung a pem dih te lai.
3. Kawl cozah nih democracy uknak leikap in ram ihruainak phung a von thlen le cangka, aa khuaihmal, ruahnak idang phun in a ummi Lai pasal ṭha hna ihmuhthiamnak a chuak cang lai. USDP tanbo ti le NLD tanbo tbk Kawl tanbo sinak in nan luat kho lai.
4. A tampi rih. CNA ca fund kawl, CNA hmai fon khawhnak sing rian ikhinh tikah, zaang a dam deuh lai i thazaang a ṭhawng chinchin cang lai. Mi luklak, mi huaha lo nih rian an ikhinh ngam tuk ti lai lo.
5. Tampi taang rih…
Mah tlukin miphun le ram caah thilṭha theipar a chuahpi ding si tikah, CNF/A nih “mah miphun party ah kan miphun hna nih nan thimfung burh ding ko uh” tiah thanhca an chuah ve awk hrimhrim a si. NLD le Pi Suu kha ṭih hna hlah uh. An hmai khah lo ah, miphun hnulei chit awk si lo.
Thimnak ah miphun party nih an sungh lai ding ṭih awk si lo. Nan ṭhutdan nakin miphun ca aa khinhmi nihcun na miphun ca tu ruat deuh. Nan caah a sang chinchin dirhmun an phanhter hnanak ding lam tu si te lai. Chin miphunpi huap upatnak le CNF ram kauhter duh ahcun, thanhca cu an chuah ve awk hrimhrim a si.
Credit: Salai C Alexander
Leave a Reply