KNU Hmunram Chung Ah 2023 Chungin Kahdohnak Voi 4,600 Renglo A Chuak, SAC Ralhrang 5,000 Renglo An Thi

KNU nih a humhak mi hmunram chungah kum 2023 chungin kahdohnak voi 4,600 renglo a chuak, SAC ralhrang 5,000 naak tlawmlo an thi, tiah KNU nih a langhter. KNU: humhak mi hmunram chungah lut in umhmun khuarmi SAC ralhrang le (K.N.L.A), (K.N.D.O) hruainak tangah ummi mipi ralkap ṭangṭi phufonh hna karlak ah kahdohnak voi 4,623 renglo a chuak tiah theih a si.

Kahdohnak chung ah SAC ralhrang commender, captain, hruaitu dang dang telhchih in 5,005 an thi, 3,345 nih hliam an tuar, (K.N.L.A) le (K.N.D.O) hruainak tangah ummi mipi ralkap ṭangṭi phufonh chungin miphun le ram caah minung 154 nih nunnak an pek, 597 nih hliam an tuar tiah theih a si. Crd- Lungmili Post.

Thawng dang: SAC Ralkap Hriamngan Le Vanlawng Kahdohnak Ruang Ah Kyauktaw le Sittwe Ah Tualchung Mi 10 An Thi. Rakhine ramkulh, Kyauktaw peng le Sittwe peng ah SAC ralkap nih hriamngan le vanlawng in kahdohnak an tuah ruang ah tualchung mi 10 an thi i minung tam ngai hliam an pu, tiah chaklei hriamtlai phu unau thum nih an thanh.

Nizan January 17, chunhnu suimilam 1:56 ah Kyauktaw peng Pyichaung hmunram Lintzin khua thar ah SAC ralkap nih hriamngan an kah i, khuapi chung in ral a zaam mi hna an i dornak inn, phungki sianginn le sianginn hna ah hriamngan kuan cu a tla i tualchung mi 10 nak tlawm lo an thi. Cu pin ah nizan January 17, ṭhiamṭhiam zinglei suimilam 6:30 hrawng ah Kyauktaw peng Tayettapin khua ah SAC ralkap hriamngan kahnak in U Saw Hla Tun (kum 52) a nunnak a liam, tiah tualchung mi nih an chim.

January 16, zanlei suimilam 6:45 ah Sittwe peng Wabo khuami pahnih cu SAC ralkap hriamngan ruang ah hliam fak ngai an pu. Cu pin ah nizan January 17, zanlei suimilam 5:00 hrawng ah Kyauktaw peng, Pyichaung hmunram Waigyithaungh khua le a kiangkap ah SAC ralkap nih Helicopter in bomb an thlak i tualchung mi 5 an thih pinah hliam a pu mi an tam, tiah theih a si.

Leave a Comment

Leave a Reply

Your email address will not be published. Required fields are marked *