Kum 18-35 Kar Poh Ralkap Ṭuan Ding Ti Mi Phung SAC Nih A Chuah

Myanmar rammi kum 18 in kum 35 pohpoh ralkap ṭuan ding ti mi phung (upadi) cu SAC nih February 10 ah a nunter, tiah theih a si. Hi phung hi rialdip uktu General Tann Shwe chan in an rak ser cang mi a si nain U Thein Sein chan le NLD chan ah an rak nunter bal lo. Myanmar ram hmunzakip ah SAC nih ral sunghnak a ton cuahmah caah hi phung hi atu thengmang ah an nunter mi a si, tiah Myanmar ramkhel thlihran a ngiatu pawl nih an ruahnak an langhter.

Cu phung ning ah cun kum 18 in kum 35 karlak a si mi pa pohpoh ralkap tlak ding a si i, kum 18 in kum 27 karlak a si mi nu pohpoh zong an i tel. Cun, thiamnak pakhat khat a ngei mi (Doctor, Engineer le a dangdang thiamnak) hna ralkap tlak ding kum rikhiah cu kum 18 in kum 45 karlak a si. “SAC nih Myanmar ram uknak a laak hnu in Myanmar ralkap ah a lut mi ralkap thar an um lo tuk caah a chambau tuk mi ralkap thazaang chap nakding ah atu bantuk in an tuah mi a si ko,” tiah Myanmar ramchung ral lei le ramkhel lei sining a ngiatu Ko Ye Myo Hein nih a chim.

SAC nih a nunter mi ralkap tlaknak phung ning ah cun kum 18 in kum 35 a si mi rammi pohpoh kum 5 tiang ralkap ṭuanter khawh an si i, ralkap tlaknak phung a buar mi poh cu kum 5 nak tam lo thongthlak khawh an si, tiah an langhter. thawng dang relchap – Mingin Peng, Kaan Khua Pyusawhti Sakhan An Kah I An Laak Ralhrang 6 An Thi, 35 Nih Hliamfak An Tuar, February 8, zing suimilam 5:50 tluk ah Sagaing ramṭhen, Mingin peng, Kaan khua Pyusawhti sakhan cu Brother Defense Force le ṭangṭi phufonh dang nih an kah i an laak pin ah sakhan an khangh piak hna ralhrang 6 an thi, tiah Yin-Mar-Bin pengkomh battalion 16, Ṭetkhuai 1 Brother Defense Force in ṭuanvo ngeitu pakhat nih Khit Thit Media ah a chim.

Sakhan laak kahdohnak ah Pyusawhti ralhrang 6 an thi, 35 tluk nih hliamfak an tuar caah Taung-Ya-Daw Pyusawhti khua lei ah an zaam, sakhan kan khangh piak hna pin ah ralthuam zeimawzat kan laak” tiah a chim chih. Pyusawhti sakhan laak kahdohnak ah mizapi ralkap nih tualchung mipi ta asi mi ramsa le thilri hna cu tualchungmi sin ah tlamtling tein an pek ṭhan, hna tiah theih a si. nKahdohnak aa telmi hriamtlai phufonh hna cu Yin-Mar-Bin pengkomh battalion 16, Ṭetkhuai 1 Brother Defense Force, BNRA, Mingin SRF, le GTF ṭangṭi phufonh hna an si.

Thawng dang relchap- Malaysia Ram Ah Myanmar Ram Mi Telh In Ramdang Mi 263 Tlaih An Si, Chin Mi 30 Hrawng An I Tel, Malaysia ram, Kuala Lumpur khuapi ah Myanmar ram mi telh in phungning loin a um mi ramdang mi 263 tlaih an tong, tiah Myanmar mi bawmchantu phu(Malaysia) sin in theih a si. Kuala lumpur khuapi, Pudu bazar pawng Singapore Hotel le tualchung mi inn ah February 8 zan suimilam 7:00 hrawngah Malaysia palik le Immigration hna i bawm in chekhlatnak an tuah i minung 263 an tlaih hna.

Tlaih a tong mi minung 263 chung ah Myanmar ram mi 50 hrawng an i tel i zeitindah an tuah te hna lai ti cu hngalh a si rih lo, tiah Myanmar ram mi bawmchantu phu in ṭuanvo ngeitu pakhat nih a chim. Palik le Immigration nih an tlaih mi 263 chung ah pa 229 le nu 34 an si. Myanmar ram mi 50 chung ah Chin mi 30 hrawng an i tel tiin Malaysia um mi Chin mi pakhat sin in theih a si.

Malaysia palik nih an chim ning ah Myanmar ram mi pawl cu lam kam ah kuva hang chak, rithaisii hman, hla thang piin chuah le au khuan an hman tuk caah pawngkam Malaysia ram mi hna nih report an pek hna i, tlaihkhih an tonnak hi a si, tiah Khumi hartong phu in Chairman nih a chim.

Leave a Comment

Leave a Reply

Your email address will not be published. Required fields are marked *