Sangau-1 Khuabawi pa Le YLA President, CYLA Hna nih Kyaw Kyaw Thihnak kongah Lih An Chimnak Cu Tayagone UPC Pastor Pa Nih Fiangte In A Leh Hna 8 January 2021 Kan theih cia bantukin, Kyaw Kyaw (kum-50) cu, Pu Fela le a nupi nih Sangai-1 YLA nih 27 December 2020 Sunday zanlei sumilam 7 ah an vuak ti a theih hnuah, a fale pahnih cu 28 December 2020 Monday zingah Kyaw Kyaw cu, sii-ai pek ding le a sining va dawthlat dingin a fial hna, lo thlam an phak ahcun Kyaw Kyaw cu a thi cia in an va hmuh i a taksa zawng a khawng dih cang tiah an ti.
Kyaw Khaw umnak Pu Fela nih a chim ning ahcun, atu an lo tuahmi zawng hi an chungkhar nih tisik anhnah an ei din ding caah an hman mi a si i a mah Kyaw Kyaw hrimhrim nih a zohkhen mi a si tiah a chim.(Pholeng) Kyaw Kyaw a Nu kan chawnh lengmang, tiah CYLA GS nih a ti mi kongah, ruak vuini 29.12.2020 ah Sangau-1 Khuabawi Pa he voi-2 an i chawnhnak kong cu Tayagone UPC Pastor pa nih chimfiannak a tuah. Pathian riantuantu Pastor ka si caah “Lih” ka chim hrimhrim lo ti zawng rak ka thei piak u tiah atang lei bantukin a langhter:
Pakhatnakah: Kyaw Kyaw hingtu a Nu Pi Ci Pen le chungkhar hnatlaknak in kei mah hrimhrim nih chungkhar aiawhin Sangau-1 Khuabawi pa cu, voi-2 kheng te ka chawnh. Kan chungkhat Sangau a ummi hna cu tuanvo rak kan lak piak u law, Sangau ah rak phum hlah u law, Saiha ah Postmortem tuah dingin rak hal hna u tiah kan ti hna caah Kyaw Kyaw ruak cu an hal hna. A sinain, an pe duh hna lo. Asiahcun, a ruak kha “Tipi” tiang chanh dingin va ti hna u tiah kan ti than hna i, an duh thiamthiam lo.
Cutikah, kei mah nih Sangau-1 Khuabawi pa cu ka chawnh i, a ka ti mi cu, “Kei Mah Lawng Ka Si Lo, Loudspeaker Ka Onh Sangau Khuapi Nih Kan Theih Dih” tiah a ka ti. Cun, kan khua mi pawi kha Kyaw Kyaw ruak cu rak pe hna ulaw, Saiha leiah Postmortem rak tuah ter hna seh, tiah ka ti i “A Ngah Lo” a ka ti, cu a siahcun, “Tipi” tiang rak kan chanh ulaw, kan mah nih “Tipi” tiang kan rak lak lai tiah ka ti than nain, “A Ngah Lo” tiah a ka ti than. Ziah mah tluk hin an “Lih” khawh hnga!
Pahnihnak: CYLA (Central Young Lai Association) General Secretary Pu JH Lalrindika nih Pholeng he interview an tuahnak ah Kyaw Kyaw a Nu zawng kan chawn lengmang tiah a ti. Hi zawng hi “Lih” tak tak a si, voikhat te hmanh YLA maw CYLA maw nih an kan chawn lo, kan mah zawng nih kan chawn ve hna lo.
Pathumnak: A Luan cia mi Ni-4 ah khan, CHRO (Chin Human Right Organization) cu, Tayagone khua ah an ra i Khua Upa hna le chungkhar he biaruah tinak kan ngeih i, Midia dang sin zawng ah bia rak chim rih hlah ulaw a tha lai, NI-2/3 cu rak kan hngak rih ko u, Remnak Lam Kan Kawl Lio Asi tiah an kan ti caah, an bia ngaih lo cu a tha lai lo tiah kan ti caah aw tiah kan ti hna.
Falam lei Upa le a dangdang Upa hna zawng inn ah an ra i chuti thiamthiam cun an kan ti. Asinain, nihin, 8 January 2021 Friday tiangah YLA si hna seh, CYLA si hna sih, thawngpang thanh zawng a um lo, a chawnh zawng an kan chawnh tilo caah Upa lei zawng nih chim nan duh mi le thil sining cu “Langhter” cang ko u tiah an kan ti caah kan chimnak hi a si.
Palinak: Khaw Kyaw a zohkhentu Pu Fela ca zawngah bia dik chim le a sining tein riantuan hi zeitlukin dah a har lai timi hi kan ruah ngai ko. Aruang cu, Kyaw Kyaw a hremtu minung pa-6 lakah hin Pu Fela a U a fapa le Pu Fela U fanu a vapa zawng an i tel ve tikah, biafiang chimnak ca le Palek sin ah, “FIR” (First Information Report) pek ding zawng thil fawi hrimhrim a si lai lo. Cun, Kyaw Kyaw fakpi in a hremtu hna lakah hin a dang YLA hruaitu a dang Pa-4 hi an si bik thei lai ti mi hi kan zumh ning a si. crd- Dong Va
Leave a Reply