Nupi Tha le Nupi Thalo Kong Phun (6)
Nupi tha nih innchung khar cu a kilven, a bawmh chan i, a nuamhter. Nupi thalo nih cun innchung khar kha hell bang in a caanter tawn. Mother’s Day ah nule le nupile hna cawnglomh a si bantuk in nule hna zong nih ralrin awk le mah hi nupi thalo nunzia hna hi hrial awk tha an si.
1. Zingka Tlaituk Thawh Hmangmi Nu
Nupi thathumi hngalh khawhnak bik cu zingka ah zeitik hmanh ah tuan ah a tho bal lai lo. Ni a tlai hnu ah a tho lai i, thawh duh lo poh ah ka dam lo ti a hmangmi nu cu nupi thalo, thathu cazin ah khumh ding an si. Mah bantuk nu nih hin chungkhar ah thil tampi a tlohter dih i, innchungkhar ah a herh lo in phaisa hlei dihnak le ngandam lonak a chuahter.
Chun laicer tiang aa hnglihmi nupi hna cu mak awk tlak hmanh an si. Fale he zei tluk buai hmanh ah zingka tuante thawh i chungkhar caah rianlim ding cu nupi tha dirhmun a si. Nupi tha cu chungkhar ah tuanbik a thotu a si lai i inn chung rian vialte tuan tein a tuan cia dih.
2. Ai Filhhnawmh Mi Nu
Inn chung leng thianghlim tein chiah a hmang lomi. Mah le hnipuan, fale le a va hni le puan hna thianghlim in a chia duh lo i, hnawk khak taktak in khuasami cu a man um lomi nu a si. Amah le mah aa upat lomi a si bantuk in a innchungkhar a upat lo pinah inn pa chakthlang le cing le la rualchan upat lomi cu a hmurka in a langh lo hmanh ah ai filhhnawmhnak nih khan a langhter lai.
Mah le pumsa hmanh thianghlim tein a um kho lo i, a rim a nam mi, innchung hna a rim a chia buin a um khomi nupi hi, nupi thalo taktak mi theihnak pakhat a si.
3. Ahmur Sau I Mi he Ai Si I, Mi Kong Ceih Le Bia Thalo Inn Chungkhar Ah A Phakpitu
Nupi cu zei tluk a fel i pumh a huammi asi hmanh ah a hmurka ai sum lomi nu cu nupi thalo a si. A leng kip ah a vak i midang kar ah bia ai thlak ruang ah le thil dikmi fiang theih loin bia a puanter mi nu cu chungkhar ah hellmei bang a ser tawn. Ral a ngei lai i a hmur sau caah khan mi nih simhmi a si lai. Mah bantuk cu nupi thalo hngalhnak lehkhana pakhat a si ve. Fale le vale cung zong ah volhpamh a hmang lai. A kaa ai sum lai lo. Mah bantuk nu cu nupi thalo lehkhana pakhat a si.
4. Phaisa Sem A Rel Kho Bak Lomi
Inn le lo zong thianghlim in a chiah kho ko. Zingka zong tuan in a tho i, chungkhar a zoh khenh ko. Phaisa zong akawl kho pah lehlam. Nain, phaisa cu ti bang in a hmang mi, phaisa semrelnak pelte hmanh a tuak lomi nupi cu nupi thalo a si. Vale chuahpimi phaisa kut cung a phanmi poh den dih lengmang a hmangmi hna hi nupi thalo an si.
Thil a biapi lem lomi tampi cawk ahmang lai. Rawl chumh chuan awk tha lem lomi neknawi tampi cawk a hmang lai. Angki le thilri a man fakmi ko thim i tam lak te shopping ah hloh a hmang lai. Thil neih ciami hna hlawnh dih a hmang lai. Tu le lek leng chuah a hmang lai.
5. A Zaw A Fak Pengmi
Thathutnak alanghtertu pakhat cu ‘ka dam lo’ ti peng hi a si. Minung hi cancer tbtk zawtnak nganmi taktak um lo ahcun a dang poh poh hi cu thinlung a si. Mah le mah zawt ah iruah ahcun zawt a si. Thathut i zeihmanh tuah huam lo i, ka zaw ti rumro a chim peng mi hi nupi thalo an si.
Siibawi he ipiah ding rumro a ruatmi a si lai. Zeitik hmanh ah damnak kong chim loin dam lonak rumro chim zai a hmang lai. Ihkhun cung rumro ah a it peng lai. A taap thulh peng lai. Khaw zei maw lungzawtnak ka ngei ti phun ngawr phun khin a um lai.
6. A Lung Khongmi Nupi
Vale nih chimh hrin le uk khawh a si lomi nu cu nupi thalo a si ve. A fel ko, a ngan zong a dam ko. Phaisa zong sem a rel ko. Tuante zong a tho, inn zong a zohkhenh, a hmur zong a sau lo, nain nupi thalo lehkhana te pakhat a um mi cu vale zei rel lo a si. Vale nih tuah awk a ti mi zeihmanh tuah tim lo, vale kha mihrut ah ruah an chimmi zeihmanh a ngai lomi nu cu nupi thalo a si thiam thiam. Vale zong nupile chim mi zeihmanh ngai lomi cu va thalo an si ve.
Note: Hi cabia hi USA Chin News timi hi kum 2018 lio ah a rak tarlangh mi a si i fiakfairawh nih naite ahkhan a tar chin. Cucu a thar in kan rel than khawhnak hnga kan tarpiak than hna.
Leave a Reply