Chin ramkulh,Matupi peng Lailenpi khua cu SAC ralhraang nih vanlei in kahdohnak a tuah caah tualchungmi 4 nunnak a liam cang i 3 nih hliam an tuar leng ah mizapi 7,000 leng nih khua chuah tak in ralzam dir hmun an phan hna tiah theih a si. SAC nih November 19 zinglei slm 9 thok in nihin November 21 tiang jet fighter hmang in bomb a thlak lengmang caah kum 50 tluk a si mi U Mecha le U Ngu Kha le a dang pahnih hna cu an nunnak a liam nain a dang pahnih hna cu an ruak zong char khawh a si rih lo caah.
A ho te sat an si kan fiang rih lo.a dang tualchung mi pathum zong hliam fak ngai an tuar caah thlopbul cuahmah an si ” tiah tualchung mi pakhat nih Khonumthung ah a chim. Lailenpi khuachung in mi cheu cu Mizoram lei ah an zam mi cheu cu khuate hna ah an zam i micheu cu ramtang ah zam cio a si tik ah facang le salaaih zong an I ken hna lo caah harnak phun phun an tong hna tiah theih a si.
SAC kah mi ruang ah Lailenpi khua chung sianginn,Biakinn hna telh in mizapi inn 50 tluk a rawk tiah theih a si. Thawng dang rel chap- Keneddy tlang kahdohnak in a zaam mi chung ah Major rank pakhat tel in SAC ralkap 11 an tlaihchap hna, pathum an thi i hriamnam zun 24 an laak, Tu zing Kenddy tlang SAC camp laak kahdohnak in a zaam mi SAC ralkap pawl cu PDF-Zoland nih an dawi hna i Major rank ralbawi pakhat tel in 11 a nung in an tlaihchap hna, 60 MM miakpi tel in hriamnam zun 24 an laak tiah PDF-Zoland sin in kan theih.
Camp kan laak dih hnu in SAC Mi-35 helicopter nih a kan kah ca ah cikkhat kan i din. Cu hnu cun a zaam mi pawl kan dawi than hna i major rank pakhat tel in SAC ralhraang 11 a nung in kan tlaih than khawh hna. Tlaih an si lio ah SAC ralkap pakhat nih hriamnam chiah duh lo in a kah hna ca ah PDF-Zoland ralkap nih an kah i a thi,” tiah PDF-Zoland in Chimphuannak nawlngeitu nih Hakha Post ah a chim.
Tedim Peng, Keneddy tlang SAC camp cu PDF-Zoland nih tu zing suimilaam 4:00 in 6:00 tiang an kah i an laak. Cu kahdohnak ah cun SAC ralkap 2 an thi i pakhat a nung in an tlaih. A dang cu an zaam caah PDF-Zoland ralkap nih an dawi hna i zanlei sang ah 11 an tlaihchap hna. Tlaih lio ah pakhat a thichap mi he SAC ralkap pathum an thi i, a nung in tlaih mi dihlak 12 an si tiah kan theih. “Kan tlaih mi SAC ralhraang pawl cu rawl zong tha tein kan pek hna i, a thi mi pathum zong tha tein kan vui hna.
SAC ralkap pawl cu hi hnu ah phung ning in chekhlat le biaceih an si te lai,” ti zong a chim. Kahdohnak ah PDF-Zoland ralkap pakhat nih ram le miphun ca ah a nunnak a pek tiah kan theih. Keneddy tlang SAC Camp laak kahdohnak ah PDF-Zoland nih hriamnam tampi an laak khawh. 60 MM miakpi tel in SAC hriamnam zun 24, 60 mm bomb thei, landmine, zenthong le kuanzen tampi an laak khawh. SAC ralkap camp cu an laak hnu ah mei in an khangh tiah kan theih.
Leave a Reply