Lawngtlai Peng Ah A Zaammi SAC Ralhrang 270 Renglo Cu Assam Rifles Nih Lunglei Khuapi Ah An Kuat Hna

India ram, Mizoram ramkulh, Lawngtlai peng ah a zaammi SAC ralhrang 277 cu India cozah nih January 18, ah Lunglei khuapi ah an kuat ṭhan hna tiah theih a si. Kan theih bantuk in January 17, ah SAC ralhrang le mipi ralkap phufonh hna cu Lawngtlai peng, Bandukbang khua pawng Myanmar ramchung Karma tiva ah an rak i kap. Kahdohnak hmun in zaanlei suimilam 4:00 tluk ah SAC ralhrang 277 hna cu Lawngtlai peng, Bandukbang khua Assam Rifles sin ah ralthuam tling he an lut.

Bandukbang khua ah a zaammi SAC ralhrang 277 hna cu Assam Rifles nih January 18, ah Lawngtlai peng, Bandukbang khua motor 8 in Lunglei khuapi ah an kuat ṭhan hna tiah kan theih. A zaammi SAC ralhrang hna hi Lunglei khuapi in zeitin dah Myanmar ramchung ah an kuat ṭhan hna lai timi cu fianghlang in theih khawh a si lo nain, Lunglei khuapi in helicopter hmangin Myanmar ramchung ah an kuat ṭhan hna lai ruah le zumh a si.crd- Lungmili Post.

Thawng dang: Penwegon-Natthankwin Motor Lamcung Kahdohnak Hna Ah SAC Chungtel 40 Leng An Thi. Bago ramṭhen, Penwegon-Natthankwin motor lamthluan ah SAC ralhrang le tualchung hriamtlai phu kar kahdohnak caan chung ah SAC ralhrang lei in 40nak tlawm lo an thi i 70 leng nih hliamhma an tuar, tiah Royal Peacock Column nih nizan January 17 ah cathanh an chuah. Kyauktaga peng, Penwegon-Natthankwin motor lamthluan um Thaekaw khua,

Hteintaw khua, Ohnhnepin khua le a pawngkam khua hna cu 2023, December in 2024, January a zarhkhatnak tiang hmunram zohfelnak kan tuah lio ah SAC ralhrang le Royal Peacock Column kar ah kahdohnak a chuak hi a si, tiah an langhter. Kap 2 kar kahdohnak caan chung ah SAC ralhrang nih hriamngan in voi 115 tluk an kah bawmh hna pinah cunglei kahdohnak voi 60 leng a tuah.

SAC nih atu bantuk in hriamngan le cunglei kahdohnak a tuahmi ruang ah tualchung mi cheukhat nih khua an chuahtak i hliamhma tuarmi zong an um. Kahdohnak caan chung ah SAC ralhrang sin in meithal zuun 2, Drone Jammer 1, seh 2, 5.56 kuanfang 1,000, hriamngan kuan 15, 60MM 10, Drone 1 le kutcheh bomb 1 zong kan laak chih khawh hna i tualchung hriamtlai in minung 1 nunnak a liam pinah 5 nih hliamhma an tuar, tiah Royal Peacock Column nih cathanh an chuahmi ah an langhter chih.

Leave a Comment

Leave a Reply

Your email address will not be published. Required fields are marked *