Lungler Ralkap Sakhan in Staff Sergeant Zaw Htoo CDM a lut

Thantlang peng, Lungler khua Ralkap Sakhan ah a tuan lio mi, KhaLahYah-269 battalion ralkap in sen thum rank (Staff Sergeant) a si mi Zaw Htoo cu August 10 thawk in CDM a tuah tiah theih a si. Atu lio ramkheel si ning he pehtlai in rammi hna he thinlung khat ka sinak langhter awk ah, keimah duh thimnak tein CDM ka tuah,” tiah a langhter. Ka hman mi hriamnam le thilri dihlak Thantlang peng Lungler Sakhan ah ka ap dih, ti zong a tialchih. Crd- the hakha post

Thawng dang: Thai palek nih buainak daihter dingin Thai ralkap Bawmhhal a timh Thailand ramchung buainak daihter dingin tuanvo pek an si nain duh ningin an cawlcangh khawh lo ruangah Thai ralkap cu bawmhhal dingin Thai palek lutlai hna nih an timh tiah theih a si. Atu lio Thailand buainak ah palek hna cu nawlngeihnak pek an si nain, buainak hi nikhat hnu nikhat zual lei a panh caah ralkap hna cu bawmh hal dingin ruahnak an ngeih hi a si.

Mipi nih palek mawtaw hna cu an khangh caah mipi cawlcanghnak hi mah nakin a zual deuh a si ahcun palek thazaang chap nak caah ralkap sin ah bawmh hal dingin kan ruah mi a si tiah Thai palek bawi Lt.Gen. Pakapong Pongpetra nih a chim. Palek hna cu kan rikhiahnak an rak lonh hlan chung cu mipi he buainak ngei lo ding nawl kan pek cang hna.Duhlonak a langhter mi hna ngolter nak caah tear gas le rubber kuan hna lawng hman dingin kan ti hna.

Palek nih atu bankin bawmh a halnak kong he pehtlaih in Thai ralkap bawizik Gen. Chalermpol Srisawasdi hao in meeting an ngei tiah theih a si. Amah belte ralkap rian cu duhlonak a langhter mi hna daihter ding si lo in ralven ding le uktu bawi umnak hna a vengtu ding an si caah palek nih bawmh a hal mi hi an pom theng men lai lo tiah ruah a si.

Za renglo mipi lam a zawh mi hna nih palek nih lam a khamtu palek hna cu tinbawsi in an cheh hna Prime minister Prayut Chan-o-cha inn panh dingin an i timh caah palek nih tear gas le khaihret kuan in an kah hna. Hi kong he pehtlaih in lamzawhnak ah a tel ve mi pakhat nih palek hi kan ral an si lo, kan ral taktak cu a cozah a si tiah a chim.

Palek nih prime minister inn kal nak lam cu pung (shipping container) le razor wire in an kham. United Thammasat and Demonstration bu nih hruaimi August 10 ni buainak he pehtlaihin pa 45, nu 3 le Mawtaw le cycle 122 cu tlaih an si i, tlaihmi 48 lakah minung 15 cu kumtlinglo mi an si.Palek bawi 9 hma an pu tiah theih a si.crd- the chin post

Leave a Comment

Leave a Reply

Your email address will not be published. Required fields are marked *