Malaysia ram ah phung ning loin kuli a tuanmi Kawlram mi chung in khualei tlung duh ah Malaysia-Myanmar Embassy ah min a pemi minung thong 10 leng an si cang tiah theih a si. Cucu Myanmar Embassy nih phung ning lo pawl tlung a duhmi nih min pek khawh a si tiah thawngthanhnak a tuah hi a si.
Khua lei tlung duh ah email in ca a kuatu le Embassy ah kal in min a pemi dihlak hi thonghra leng an si cang tiah Malaysia-Myanmar Embassy riantuanmi U Aung Zaw Min nih a chim hi a si.
Malaysia raam ah phung ning loin a phanmi pawl khualei tlunter thannak kong le Ringgit 3000 liamter lo ding kong pawl cu Myanmar Embassy in tuanvo ngeitu hna le Malaysia ramdang vuanci zung in tuanvo ngeitu hna cu kan hnu June 22 ni ah ceihtinak an ngei hna.
Nain nihin tiang tlung a duhmi min cazin lak lawng a si rih i Malaysia cozah lei nih phaisa liamter lo ding timi kongah lehnak an tuah rih lo tiah theih a si. Cu bantuk dirhmun a si caah phung ning loin a ummi tlaih a tongmi zong an um len tiah Malaysia phan Kawlrammi sin in theih a si.
Malaysia ram ah phung ning tein a ummi hi minung sing (3) hrawng an si i phung ning loin a ummi he fonh ahcun Kawlrammi dihlak sing (5) leng an si lai tiah ruahdamh a si.
Malaysia ram ah Covid-19 pulrai zawtnak ruang i lockdown tuahmi siseh, phung ning loin a ummi pawl tlaihkhih an tong ruangah siseh Malay rianngeitu hna nih phung ning loin a ummi pawl cu rian pek an ngol ti zong in theih a si.
Cucaah Kawlram mi pawl cu khualei tlung khawh tung loin ei le din tiang harsatnak an tong ngai caah mah le mah aa thahmi minung 13 tiang an si cang tiah theih a si. DVB nih a tarlangh.
Ref: DVB
Leave a Reply