Mali ram ah cunglei an bawi nawl a ngai lomi ralkap hna nih President le Prime Minister cu cawn nihnihni ah an tlaih tiah theih a si. Cu ralkap hna nih cun cunglei hmuah in an meithal an puak pinah nawl ngeihnak lak bantuk in an cawlcang ti si.
Hi ti an tlaihmi hi mipi nih a thlathla in an President Boubacar Keita chuak seh tiah an duhnak an langhter hnuah tu bantuk President tlaihnak thawngpang a chuak hi a si.
Ralkap hna cu Mali ram Bamako khualipi lam cungah an duh paoh in an chawk i zeizong vialte anmah uknak tang ah a um dih cang timi an langhter ti si. Nain President dirpitu ralkap lei nih zeihmanh an chim phuanmi a um rih lo.
Minlanghter a duh lomi cozah riantuan pakhat zong nih President le Prime Minister an tlaih hi cawn nihnihni zanlei sangah a si tiah media hna nih fehternak a tuah.
Tutan buainak ah nawlngeihnak a latu ralkap hna nih Kati khuapi i ralkap sakhan bawile an tlaih i hriamnam pawl an lak hnuah a tu President le PM tiang an tlaih chih hi si. Cu ralkap hna nih cun tubantukin nawlngeihnak kan lakmi hi cozah duh lo ruang i sandahpiahtu hna nih an kan thohkhan tiah an chim.
Prime Minister nih cun anmah lei ttangmi ralkap pawl kha an hriamnam chiah ding in a forh hna. Tuzing cu cozah office chungah a buaimi ralkap pawl an lut i Financial Minister telh in cozah riantuan pawl an tlaih caah cozah riantuan pawl cu an office in an zam ti zong in theih a si.
Tutan thil cang cu 2012 kum lio i nawlngeihnak lak bantuk a si ti si. Mali ram ahhin ramkhel daihnak a len khawhnak hnga a hawikom tha France le UN nih kum 7 leng an i zuam nain tu bantuk buainak a chuak than tiah theih a si.
Ref: ONM
Leave a Reply