Manchester City Ah Messi A Lut Cang Timi Kong Ah Messi Hrintu Pa Nih Fianternak A Tuah

Messi kong he pehtlaih in thawngpang tampi a chuak i cu thawngpang lakah Messi cu Manchester City ah i thial ding in biachahnak a tuah cang timi thawngpang zong aa tel.

Messi nih Manchester City Club ah thial ding in biachahnak a tuah timi thawngpang cu hramhram in tuah chawmmi thawngpang deu a si tiah Messi Agent zong a simi Messi a pa Jorge Messi nih a chim. Argentina News Agency La Nacion nih Messi kong a tarlanghmi cu Jorge Messi nih a si lo tiah alnak a tuah hi a si.

Messi nih Barcelona chuak tak ding in theihternak ca a pek hna hnu in Manchester City a cawlcang ngai i khatlei in France Club PSG zong nih auh ding aa zuam ve ti si. Messi kong he aa pehtlaihmi thawngpang zong tampi a chuak i cu chungah Messi cu Man City ah thial ding in biachahnak a tuah cang timi thawngpang aa tel hi a si.

Argentina News Agency La Nacion nih Messi kong an chimmi cu, “Hi biachahnak hi ka nupi Antonia he kan tuahmi a si. Hi ti kan biachahnak kong ah kan lung a tha lo ngai ve. Nain kan tuah cang. Kan van nih biachahnak a tuahmi a si. Keimah zong Pep he kan i chawnh i amah zong nih Man City ah auh a ka duh tiah Messi nih a chim” tiin aw in an chimh hi a si.

Cu kong he pehtlaihin Jorge Messi nih “Hello, La Nacion, hi hi thawngpang deu asi. Hi bantukin Messi nih a chimmi a um lo. Hi hi thawngpang deuh a si” tiah a Instagram in fianternak a tuah hi a si. Atu hi Barcelona nih Messi cakuat kong an ruahpiak cuahmah lio a si i zeibantuk dirhmun tiang a phan cang timi belte theih fian a si rih lo.

Barcelona fan pawl nih cun Camp Nou Stadium lenglei ah an i pumh i Messi chuak lo ding in nawlnak an tuah ti si. Tu lio cu minthang club pipi zong nih Messi auh ding an izuam i PSG nih cun Messi Agent pawl he ton ding an i zuam len tiah theih a si.

Ref: DW

Leave a Comment

Leave a Reply

Your email address will not be published. Required fields are marked *