Tuzan puai cu vawlei cung nih cuanhmi puai a si i, a hleice in Kawlram mi, cu hmanh ah Kachin mi le kanmah Laimi ko hi zoh lai kan i ngaihbik rua tiah ka ruah. Tuzan ah Aung La Nsang a sungh sual ahcun a Middleweight taisawm sungh ding a si lai caah Aung La fans pawl caah thinphang khun.
Tutan Aung La cu UFC ah a lar taktak mi McGregor nih undefeated Khabib “The Eagle” Nurmagomedov a tei kho lo bantukin undefeated Reinier De Ridder tei kho lo in a um ve sual lai phang a um ko.
Coner McGregor cu UFC ah puai 26 aa phomh i cu chungah puai 22 teinak a hmuh. Puai 4 a sung caah 22-4-0 in record a tial. Aung La Nsang hi ONE Championship ah puai 37 aa phomh cang i, puai 26 teinak a hmu i, puai 10 bak a sung ve caah 37-10-1 in record a tial ve.
Coner MeGregor hi UFC Featherweight le Interim Featherweight Champion voikhat veve, cu hnu ah Featherweight le Lightweight zongah Champion taisawm pahnih a rak kemhmi a si. Cu ve bantukin Aung La N Sang zong, ONE Championship ah tu lio Light Heavyweight le Middleweight Champion taisawm pahnih a kemhtu asi ve.
MeGregor a teitu Khabib hi puai 29 puai aa thonghnak ah tuzan tiang a sung ballo caah 29-0 record a tialmi a si i, atu Aung La Nsang he aa phomh dingmi Reinier De Ridder zong hi MMA dirhmun ah voi 12 aa phomhnak voikhat hmanh a sung bal lo caah 12-0 in record a tialmi a si ve.
UFC ah a lar taktakmi McGregor cu undefeated Khabib “The Eagle” Nurmagomedov nih a singkhaw ve tikah Khabib nih thih deng in a reh chih i McGregor cu celh loin a sungkhan colh ko. Tutan Aung La Nsang a singkhawtu Reinier De Ridder hi McGregor a singkhawtu Khabib bantukin wrestling a thiam taktak mi a si ve tikah Aung La Nsang hi cawl kho loin a tuah ve sual lai phang a um ko. De Ridder nih mi a teinak video pawl zoh than tikah a reh reh chih deuh an si.
Leave a Reply