MDF Nih An Ram Chungah Hriamtlai Dang Lut Lo Ding Than

Maraland Defense Force-MDF Nih An Ram Chung Ah Hriamtlai Phu Dang Lut Lo Ding In Ralrin Peknak An Tuah, Maraland Territorial Council/Maraland Defense Force (MTC/MDF) nih biakhiahnak an rak tuah cang bantukin Maraland Territorial Council nih a uk mi hmunram chung ah MDF dah ti lo zei bantuk hriamtlai phu hmanh luh le cawlcangh khawh a si lo, tiah nizan January 18 ah Maraland Defense Force-MDF nih an thanh. A liamcia 2022 February 1 ni a voi khatnak Mara mipi tonpumhnak ah biachiah mi.

2022 October 28-29 ni ah tuah mi laakhruak Council tonbiaruahnak biachah mi le 2023 April 24 ni ah Maraland Territorial Council nih bia a chah cang mi ning in Maraland Territorial Council nih a uk mi hmunram chung ah MDF dah lo mizei hmanh nih hriamtlai phu an ser kho lo i cawlcanghnak nawl an ngei lo, tiah Maraland Defense Force nih cun an thanh. Maraland Territorial Council/Maraland Defense Force (MTC/MDF) nih a herh lo mi ah buainak chuahter kan duh lo caah voi tampi ralrin peknak kan rak tuah cang ko nain a hlankan in theihternak tuah hmasa lo in.

Mara hmunram chung ah hriamtlai phu dang pawl lut in an cawlcang, umhmun khuar in buainak an chuahpi tawn ruang ah voi tampi biakhiahnak kan tuah mi an buar a si, tiah MDF nih an langhter.MDF le hriamtlai phu dang kar ah a herh lo mi hnahnawh buaibainak a chuah kan duh lo i atu ralrin peknak cathanh kan chuah ni thawk in a hlankan in theihternak tuah hmasa lo in MTC hmunram chung ah umhmun khuar le cawlcanghnak tuah ti lo ding in a donghnak bik ralrin kan in pek hna, tiah MDF nih an langhter chih.

Mararam chung ah hin tualchung hriamtlai CDF-Mara an um ve i, hi cathanh kong he pehtlai in lehnak an tuahmi hmuh ding a um rih lo. CDF-Mara nih January 17 i an thanh ning ah, CDF-Mara Tactical Operation Command le Commanding Officer tel in CDF-Mara ralkap 4 cu AA le MDF nih a luancia January ni 5 le 7 ah an rak tlaih hna, tiah theih a si. Thawng dang relchap- Lailenpi Khuapi Pawng Ah MDF Nih CDF-Mara Ralkap 2 An Tlaih Ṭhan Hna, 6 An Tlaih Cang Hna.

Chin ramkulh, Lailenpi khuapi pawng ah Maraland Defense Force (MDF) nih CDF-Mara ralkap 2 cu an tlaih ṭhan hna i zarh hnih chung ah CDF-Mara ralkap 6 an tlaih cang hna, tiah kan theih. January 19, zing suimilam 10:00 tluk ah Lailenpi khuapi pawng meng 9 ah CDF-Mara Battalion 3 in Commander Sang Hnin le ralkap Ra Lai hna cu MDF nih an tlaih hna, tiah CDF-Mara chimphuannak nawlngeitu nih a chim. “An rak tlaihmi hna minung 4 zong nihin tiang an thlah rih hna lo. Nihin zing zong ah minung 2 an thlaih ṭhan hna.

Commander cu thilcawk a kal lio ah an tlaih i ralkap pakhat cu mi a thlah lio ah an tlaih” tiah a chim. Commander Sang Hnin cu an tlaih lio ah meithal zuun khat aa ken i ralkap Ra Lai cu an tlaih lio ah zeibantuk hriamnam hmanh aa ken lo, tiah theih a si. Aluan ciami January 5 ah Shwelaikwa khua ah CDF-Mara Battalion 4 in ralkap 2 cu MDF nih an rak tlaih hna i CDF-Mara in Strategist Htet Sang le Battalion Commander Khu Ma hna nih MDF le Rakhine ralkap AA ṭuanvo ngeitu hna sinah thlah ding in an rak hal hna.

AA le MDF ṭuanvo ngeitu hna nih Shwelatwa khua nan phak ahcun kan thlah colh hna lai. Nan him khawh nakhnga zong ṭuanvo kan in laak hna an ti caah January 7 ah CDF-Mara Strategist le Battalion Commander hna cu an kal i an rak tlaih ve hna” tiah CDF-Mara nih January 17 ah thawng an thanh. “Atu hi MDF ralkap pawl cu Lailenpi khuapi pawng meng 9 hmun ah thazaang an chap i CDF-Mara ralkap an tlaih lengmang mi hna hi Lailenpi khuapi humhak an duh caah a si kho men” tiah CDF-Mara chimphuannak nawlngei tu nih a chim.

Chin ralkap ṭangṭi phu hna simi CNF/CNA, CDF- Mara, CDF- Matupi, CDF- Lautu, CDF- Zophei, CDF- Thantlang Drone phu hna nih November 19 ah Lailenpi khuapi um SAC Khah-lah-yiah 304 sakhan cu an kahdoh i November 24 ah tlamtlingte in an laak khawh, tiah kan theih.

Leave a Comment

Leave a Reply

Your email address will not be published. Required fields are marked *