MDF Nih CDF-Mara Ralkap 2 An Tlaih Ṭhan Hna

Lailenpi Khuapi Pawng Ah MDF Nih CDF-Mara Ralkap 2 An Tlaih Ṭhan Hna, 6 An Tlaih Cang Hna, Chin ramkulh, Lailenpi khuapi pawng ah Maraland Defense Force (MDF) nih CDF-Mara ralkap 2 cu an tlaih ṭhan hna i zarh hnih chung ah CDF-Mara ralkap 6 an tlaih cang hna, tiah kan theih. January 19, zing suimilam 10:00 tluk ah Lailenpi khuapi pawng meng 9 ah CDF-Mara Battalion 3 in Commander Sang Hnin le ralkap Ra Lai hna cu MDF nih an tlaih hna, tiah CDF-Mara chimphuannak nawlngeitu nih a chim.

An rak tlaihmi hna minung 4 zong nihin tiang an thlah rih hna lo. Nihin zing zong ah minung 2 an thlaih ṭhan hna. Commander cu thilcawk a kal lio ah an tlaih i ralkap pakhat cu mi a thlah lio ah an tlaih” tiah a chim. Commander Sang Hnin cu an tlaih lio ah meithal zuun khat aa ken i ralkap Ra Lai cu an tlaih lio ah zeibantuk hriamnam hmanh aa ken lo, tiah theih a si. Aluan ciami January 5 ah Shwelaikwa khua ah CDF-Mara Battalion 4 in ralkap 2 cu MDF nih an rak tlaih hna i CDF-Mara in Strategist Htet Sang le Battalion Commander Khu Ma hna nih MDF le Rakhine ralkap AA ṭuanvo ngeitu hna sinah thlah ding in an rak hal hna.

AA le MDF ṭuanvo ngeitu hna nih Shwelatwa khua nan phak ahcun kan thlah colh hna lai. Nan him khawh nakhnga zong ṭuanvo kan in laak hna an ti caah January 7 ah CDF-Mara Strategist le Battalion Commander hna cu an kal i an rak tlaih ve hna” tiah CDF-Mara nih January 17 ah thawng an thanh. “Atu hi MDF ralkap pawl cu Lailenpi khuapi pawng meng 9 hmun ah thazaang an chap i CDF-Mara ralkap an tlaih lengmang mi hna hi Lailenpi khuapi humhak an duh caah a si kho men” tiah CDF-Mara chimphuannak nawlngei tu nih a chim.

Chin ralkap ṭangṭi phu hna simi CNF/CNA, CDF- Mara, CDF- Matupi, CDF- Lautu, CDF- Zophei, CDF- Thantlang Drone phu hna nih November 19 ah Lailenpi khuapi um SAC Khah-lah-yiah 304 sakhan cu an kahdoh i November 24 ah tlamtlingte in an laak khawh, tiah kan theih. Thawng dang relchap- Thla 3 Chung Kahdohnak Ah SAC Kut In Rakhine Le Paletwa Tualchung Mi 80 Leng Nunnak A Liam, 260 Hliam An Tuar.

Aluan ciami 2023, November 13 thok in Rakhine ramkulh le Chinram Paletwa pengchung kahdohnak caan chung ah SAC ralhrang chungtel hna nih an thlaih hna i an thahmi hna telh in hriamnngan le cunglei kahdohnak ruang ah tualchung mi 81 an nunnak a liam pinah minung 260 nih hliamhma an tuar, tiah HDCO nih nizan January 18 ah thawng an thanh. Nunnak liammi le hliamtuar mi hna cu Maungdaw, Buthidaung, Rathedaung, Sittwe, Ponnagyun, Kyauktaw, Mrauk-U, Minbya, Myebon, Ann, Kyaukpyu, Ramree le Chinram Paletwa pengchung hna ah an si.

Nunnak liammi an tam biknak hmun cu Mrauk-U ah a si i minung 15 an nunnak a liam, tiah an langhter. Thla 3 chung kahdohnak caan chung ah unnak liammi hna cu pa 56 le nu 25 an si i hliamhma tuarmi pa 140 le nu 120 an si. 2023, November thlachung ah minung 28 nunnak a liam i minung 103 nih hliamhma an tuar. December thla chung ah minung 27 an nunnak a liam i, minung 66 nih hliamhma an tuar. 2024, January thla ah minung 26 an nunnak a liam i minung 91 nih hliamhma an tuar, tiah HDCO nih thawng an thanhmi ah an langhter chih.

Leave a Comment

Leave a Reply

Your email address will not be published. Required fields are marked *