Messi cu tu lio pumpalulh thawngpang ah hmunhma a la bik tu a si i a hmailei kongah a phunphun in ruahdamh le ceih cio a si. Tutan zong Argentina President Alberto Fernandez pumpak hrimhrim zong nih Messi cu a chuahkehnak ah rak kir than ko tiah a sawm ve cang ti si.
A club hlun Newell’s Old Boys club ah a chan chung celh ding in President nih Messi a forhfial i, Messi pumpalulh chuih dan a thei bal rih lomi hna caah theih khawhnak caantha a pek hna awk a si tiah a chim.
Messi cu tu lio football media ah hmunhma labik a si i zei club ah a lut te hnga tiah vawlei cung mipi nih cuanh cuahmah liomi player a si. Barcelona chuak tak ding in nawlnak a tuah hnu ah Messi khoika a phan te hnga tiah vawlei cung nih cuanh liopi a si.
Manchester City, PSG, Juventus, Inter Milan tibantuk club lianlian pawl zong nih Messi auh an duh i Barcelona nih cun Euro Pound 700 million a pek ahcun aho paoh nih auh khawh a si tiah a phuan ve. Atu cu Argentina President Alberto Fernandez tiang nih Messi a sawm ve tikah mipi thinlung ah a hung lut chin.
“Nangmah cu kan thinlung ah na cam peng. Kan ram chungah naa chuihmi kan in hmuh bal rih lo. Newell ah na pumpalulh chuih caan donghter law, kanmah vialte na kan lawmhter ko lai. Newell cu nangmah team a si ko” tiah President Alberto Fernandez nih Argentina News Agency C5N ah chim in Messi sawmnak a tuah hi a si.
President Fernandez cu Maradona fan pakhat a si i pumpalulh chuih zoh huam ngaimi zong a si. Tu bantukin Messi sawmnak a tuahmi zong Newell club caah ruahchanhnak nganpi a si ve. Newell fan pawl zong nih Messi ra than seh tiah nawlnak hna an tuah len ve tiah theih a si. Duwun nih a tarlah.
Ref: DW
Leave a Reply