Nai i minung 137 an thihnak Lebanon ram, Beirut Port thil puahnak kong he pehtlaih in Lebanese tuanvo ngeitu hna nih hlathlainak an tuah hnuah tuanvo ngeitu minung 16 an tlaih cang tiah theih a si.
Hmasa hlathlainak an tuahmi ah Beirut port i Tax collectors minung 18 an chek hna tiah Lebanese ralkap biaceih zung in Judge Fadi Akiki nih a chim tiah Lebanon ram ngeihmi NNA News Agency nih a phuan. Hlathlaimi hna le tlaihmi hna kong cu fiang tein langhter chih a si rih lo.
Beirut Port pawng i thilri chiahnak Kodong ahhin Amonium Nytrate (ton 2750) an chiahmi kong he pehtlaih in President nih a chim hnu ah tuanvo ngeitu Port nawlngeitu hna cu inn thong thlah chun ding in cozah nih nawl a chuak hnu a thaizing ah tu bantuk in an tlaih hna ti a si.
Reuters nih a tarlangh ning ahcun Beirut Port General Manager Hassan Koraytem zong tlaihmi ah aa tel ve tiah theih a si. Cawn nihnihni i thil puakmi cu a pelpoi an charmi Ammonium Nytrate ruangah a si ko tiah Lebanese Prime Minister Hassan Diab nih sual a phawt hna.
2020, August 4 ni ah Beirut khualipi ning pi in a lautertu thil puak ruangah a tlawmbik minung sing 3 deng cu inn le umkheng ngei loin an um i billion tampi man a rawk dih tiah Beirut’s city governor Marwan Abboud nih a chim.
Nihin ahcun thil puakmi hlathlainak kong he pehtlaih in vawlei cung thiamsang hna sawm ding ah minung covo aupitu phu nih Lebanese nawlngeitu hna an forhfial cang hna ti si.August 5 ni zongah Amnesty International phu nih vawlei cung cu bawmhnak pek cio ding in nawlnak a tuah ve hna.
Cawn nilini ahcun French President Emmanuel Macron cu Beirut a phan i Beirut mipi chambaunak um loin kan in bawmh hna lai tiah bia a kamh hna tiah theih a si.
Ref: MMPF
Leave a Reply