Miphun Dawt Timi Cu Zeidah Asi

Minung asimi poahnih kan miphun kan dawt dih. Miphun dawtnak a sum kan tahning, a cawi kan thlaih ning, le a muisam kan cuanhning belte khah dih khawh phung asi lo.  Kanmah le kan sining cio in miphun caah kan tuan khawhmi kha miphun dawt asi ko. Miphun dawt timi hi hmunhma le muici a ngei lo.  Khuazeiram kan umnak hmanh ah miphun dawtu kansi kho. Mah chuahkehnak ramchung um thengmang long ah miphun dawt asi lo. Miphun dawt timi cu hmunhma le muici a ngei lo. Minung thinlung chungah a nungmi dawtnak asi.

Miphun dawt timi hi mah miphun holh a holh kho mi long dawt asi lo. Mah miphun holh tanh bu zong in miphun zuartu le lei ruaitu kansi kho.  Asinain khuasaknak le riantuannak hmunhma ruangah hmundang le ramdang ah a ummi hna nih mah miphun holh an thiam ti lo hmanhah miphun dawtu ansi kho. Zeicahtiah miphun dawt timi cu holh le kaa long asi lo, nunzia le lungput ah a ummi asi.Miphun dawt timi hi mah khua, mah tlang, mah holh khat minung he thitum long ah dawt asi lo.  Khuadang tluangdang miphun dang he thitum zongah miphun dawtu ansi kho. Zeicahtiah miphun dawtnak timi cu minung pumpak zonruah khawhnak le minung hawi dawtnak cungah a um mi asi.

Miphun dawt timi hi mah Khrihfabu min ah miphun min bunh theng long ah dawt asi lo.  Nichuahlei ram hna nih Khrihfabu min ah miphun min bunh kan uar nain Nitlak lei ram hna nihcun an uar tuk lo. Bible chungah miphun min bunh Khrihfabu (Judah, Samaria, Jentail,  le  Rom miphun) a um lo. Rom khua, Efesa khua le Korinth khua ah a ummi Khrihfabu ti long a um.  Khirhfabu min ah miphun minbunh hi Bible duhning asi lo. A ruang cu Khrihfabu hi mi phunta asi lo, Khrih taa asi, Khrih thisen in cawkmi asi.

Miphun dawt timi hi mirum, mifim le cathiam sangmi hna long nih dawt khawhmi asi lo.  Sifak, lothlo cathiam lo hna zong nih mah le sining in dawt khawhmi asi.  Cu caah miphun dawtnak timi cu mah le sining cio in dawt kha asi caah a niam a sang thleidannak a um lo. Miphun dawt timi hi vulei cung ramkip a ummi kan miphun dihlak thleidannak um lo in dawt kha asi. Mah khua, mah tlang, mah khrihfabu le mah holh khat long dawt cu miphun dawt taktak asi lo.  Cu bantuk miphun dawtnak cu tlam a tling lomi le a ngan a dam tuk lomi dawtnak asi.

Miphun dawt le Khrihfabu dawt aa khat lo.  Miphun le Rammi sinak tuanvo (citizen role) le Khrihfa sinak (Christian role) tuanvo aa khat lo. Khrihfa sinak nih miphun thanchonak kha a bomh nain a lu bik cu Khrih asi, miphun asi lo.  Miphun sinak le ram uknak hruaitu cu biaknak phung asi lo, ram upadi (civil law) asi.  Cu caah biaknak le uknak thennak phung an sernak asi. Miphun rualremnak (unity) timi hi aa dang liangluangmi kan holh (language), kan nunphung (culture) le kan zumhnak (doctrine) ah a um lo.

Kannih dannak tampi kha upat peknak (respect diversity) le pakhat le khat theihthiamnak (mutual understanding), ngaihthiamnak (forgiveness), le cohlannak (recognition) tu ah a ummi asi. Miphun a liannganter tu cu rumnak, nawlngeihnak le fim thiam sannak long hi ansi lo.  Miphun a liannganter tu cu dinnak asi, Sualnak cu zeimiphun poah caah ningzahnak asi (Phungthlukbia 14:34). Credit by Rev. Dr. Samuel Ngun Ling.

Leave a Reply

Your email address will not be published.