Miss Ruth Par Tin Dim @ Angelina Ruth “Miss Teen Tourism 2021” i zuam ding in Philippines ram, July thla ah a kal lai

The Hakha Times, May 28, Miss NewFace International 2020 Winner a si mi Miss Ruth Par Tin Dim cu July thla chung ah tuah ding mi Miss Teen Tourism 2021 zuamnak ah Philippines ram khualipi Manila ah a kal lai, tiah kan theih. Amah hi NewFace ti mi Model Agency nih tuah mi Miss zuamnak ah Winner luchin cotu a si i Myanmar ram ai-awh in Philippines ram ah kal aa timh hi a si.

Philippines ram in teinak luchin he ka rak tlung kho te lai ti hi ruahchannak ka ngei ko. Aruang cu atulio kan ram buai lio ah harlefe (har taktak) in kan i zuamnak kha Pathian nih a kan theihpiak lai i teinak a kan pek lai ka zumh ca ah a si. Cun, Chin G-Z pawl upat kan pek hna. Nunnak a pe cang mi hna zong kan upat tuk hna. Miphun le ram ca ah nunnak nan thaap mi ka hmuh tik ah kan upat khun hna.

Teinak kan hmuh hlan tiang hmai ah kalti rih usih. Keimah zong mizapi nih cu hlan nakin thazaang nan ka pek i nan ka dirpi rih naklai kan nawl hna,” tiah The Hakha Times ah a chim. Angelina Ruth hi 2020 June thla ah Modeling lei training a rak kai. City puai fa deuh mi Miss zuamnak ah Second Runner-up zong a rak hmu bal.

Miss zuamnak taktak hi 2020 October thla in a luut mi a si, tiah kan theih. Miss Angelina Ruth cu Hakha khuami Pu Thla Ceu le Thantlang Peng Tluangram khuami Pi Sui Dawi (Doi) hna i an fale 5 lak ah 3nak a si. Hakha ah khua an sa.Crd-The Hakha Times.