Mizoram Ah A Zaam Mi SAC Ralhrang 690 Leng An Si Cang

India, Mizoram ramkulh, Lawngtlai peng Parva khua ah aluan ciami 2024, January 17 ah SAC ralhrang 278 cu Assam Rifles sinah hriamnam le ralthuam pawl he an i ap ṭhan i Mizoram chung ah a zaam mi SAC ralhrang chungtel dihlak 694 an si cang, tiah Mizoram tualchung thawngzamhnak hna nih nihin January 18 ah phungningte in thawng an thanh.

Aluan ciami thla 2 chung lawng ah SAC ralhrang chungtel 416 cu India, Mizoram ramkulh ah an rak zaam cang i India cozah hnatlaknak in SAC ralhrang nih Mizoram khualipi Aizawl khuapawng um Lengpui vanlawng bual ah vanlawng in a rak laak cang hna. Sakhan laak kahdohnak caan chung ah India, Mizoram ramkulh ah a zaammi SAC ralhrang chungtel dihlak 694 an phan cang, tiah kan theih.

Thawng dang relchap- Myingyan Ah Ralkap Thazaang Chap Dingin A Ra Mi SAC Ralhrang Motor 2 An Kah 7 An Thi, Hliamtuar An Tam, Mandalay ramṭhen, Myingyan peng ah ralkap thazaang chap dingin a ra mi SAC ralhrang motor 2 bomb puahhnawh in an kah motor 1 aa rawk, tiah Red Dragon Guerrilla Force (Myingyan) in ṭuanvo ngeitu pakhat nih a chim.

January 17, zing suimilam 11:30 tluk ah Natogyi peng, Phaungchi khua pawng ah SAC ralhrang le mipi ralkap karlak ah kahdohnak a chuak. Cu kahdohnak hmun ah ralkap thazaang chap dingin motor 2 he a ra mi SAC ralhrang thazaang 30 tluk cu mipi ralkap nih bomb puahhnawh in an rak kah hna caah motor 1 aa rawk tiah People’s Spring Media nih a langhter.

Bomb puahhnawh kahdohnak ah SAC ralhrang 7 an thi, hliamtuar an tam, motor 1 aa rawk, drone 1 le meithal kuan zeimawzat kan laak” tiah Red Dragon Guerrilla Force (Myingyan) in ṭuanvo ngeitu pakhat nih a chim.

Leave a Comment

Leave a Reply

Your email address will not be published. Required fields are marked *