Mizoram Vanlawng Bual Ah Myanmar Rammi Nu Pakhat Sinin Rupees Sing 3000 Leng Man Rithaisii An Tlaih. Mizoram, Lengpui vanlawng bual ah Myanmar rammi nu pakhat cu 10 kg leng a ritmi, Rupees sing 3000 leng man Methamphetamine (Crystal Meth) he palik nih October 3 ah an tlaih, tiah theih a si. Rithaisii cu Myanmar ram in Kala ram lei ah kalpi ding in timhtuahmi a si i, Myanmar ram mi Lalremthangi(kum 38) nih a thilri chiahnak suitcase chung ah rithaisii hi a chiah.
Suitcase hi Indigo X-Ray seh nih a zoh lio ah lunghrinh a si i, palik nih checkhlatnak an tuah hnu ah Mizoram Police ANTF(Anti-Narcotics Task Force) nih an tlaih. Ritsi ngeitu zong tlaih ve colh a si i, ND&PS Act le Foreigner Act in taza cuai a si. Atutan rithaisi an tlaihmi hi tukum Mizoram chung rithaisi an tlaihmi lak ah voikhat i a tam bik an tlaih tan a si. Crd- The Chin Post.
Thawng dang: Myanmar ramchung September thla kahdohnak ah SAC ralbawi Colonel, Deputy Colonel le Major rank telh in officer 10 an thi, tiah Khit Thit Media nih an khawmhsuat mi in theih a si. Karen ramkulh, Myawaddy peng GAD zung cu September 3 zanlei ah Federal Wings phu nih drone in bomb an rak thlak i Myawaddy peng uktu Major hlun Soe Tint, pengkomh GAD uktu Htun Htun Lin, pengkomh cazin Pyi Phyu Aung le palik bawi Nay Lin Soe an rak thi. Pengkomh palik uktu telh in 14 zong hliamhma an rak pu.
Mon ramkulh Kyaikhtu peng zongah dalan tiin a minthang ngai mi ralbawi hlun Deputy Colonel Aung Lwin(pension)le a chungkhar zong min hngalh lomi hriamtlai nih September 8 ah an rak kah hna i Deputy Colonel Aung Lwin cu a thi. Cu pinah Bago ramṭhen, Yetarshe peng Shwethaung khua hlun ah rallam a sialmi SAC ralkap cu Naypyidaw PDF nih sniper in an kah hna i SAC ralkap an lamhruaitu le 60mm in kah a bawmtu pakhat an rak thi.
Kaya ramkulh, Hprosu peng Makharawsi khuapawng ah SAC ralkap le PDF cu September 11 ah an rak i kap i, SAC ralkap Battalion telh in ralkap tampi an thi .Meithal zun 20 hrawng zong PDF nih an rak laakpiak hna. Karen ramkulh, Kyainseikgyi peng zong ah September 14 ah SAC ralkap le PDF, KNLA kar kahdohnak a rak chuak i ṭangṭi phu nih sniper in SAC ralkap ralbawi Deputy Colonel cu an rak thah i ralkap 10 nak tlawm lo an thi.
September 20 ah Htikapalay sakhan zong KNLA nih an kah i Khah Lah Yah 32, an Company Commander pa zong a thi, tiah Khit Thit Media nih a langhter. Kachin ramkulh, Hpakant peng ah Hpakant sii-inn ah Major Soe Naing Win telh in a kuttang pahnih cu hriamtlai phu nih an kah hna i Major Soe Naing Win cu a thi. Cu ṭhiamṭhiam in September 27 ah Shan ramkulh,
Muse lei ah a kalmi SAC ralkap motor cu TNLA nih an kah i Battalion Commander telh in ralkap 9 an rak thi. Mon ramkulh, Mawlamyaing pengkomh Ye peng Kyawng khua hrambunh Khah Mah Yah 591 in Battalion Commander le ralkap 3 cu September 30 zing suimilam 11:00 hrawngah motor in an chuak i Ye Bilu phu nih an kah hna i Captain telh in ralkap 3 an thi, tiah theih a si.
Leave a Reply