MP Hlun Pi Za Tlem Nih A Party Caah Lih In Vice President Le Sayamah Far Ki A Soisel Hna Nak Kan Van Fianter: By Ro Lian
MP hlun Pi Za Tlem nih October 6, 2020 a facebook Timeline ah Chin Party vote pek a herhnak kong ca a tial mi ah Vice President Henry Van Thio nih Sayamah Far Ki vawlei a pek ti in ca a tial mi hi lih le hrokhrol a si zia kan van fianter rih lai.
Thil dik lo cu doh a herhmi le fianter a hau peng mi a si. A bik in Party caah vote kawlnak tuah cu a phung a si ko nain lih in vote kawl phung a si maw? Pumpak thangchiatnak in vote kawl phung a si maw? Hihi MP hna a tuan cang mi nih hi bantuk catial in Party soisel le doh cu kan miphun ca ah ral ngan a si kho mi a si caah fianternak kan van tuah.
Pi Za Tlem nih a tialmi ca point 7 chung ah point 6nak hi Vice President le Sayamah Far Ki kong a si i Point 7nak hi Vice President Van Thio soiselnak a si. Hi chung ah Point 7nak cu fianternak kan van tuah cang caah point 6nak tu hi kan van fianter lai.
Pi Zatlem tial mi point 6nak a ning tein kan van langhter hmasa lai.
“6. Hakha vulei ningcanglo chuhmi kong ah keimah pumpak in siseh lothlobu pawl aiawh in siseh Kawlbawi pawl hi ka ton peng hna kawl bawi pawl hi an khuaruah a har tuk. Vulei chuhnak kong i nawlngeihnak liancem cu nanmah Chin mi Henry Van Tthio pei si cu zei tindah upadi lonh in Inn ttheh tiang le lo chuh dih tiang cu nan ton khawh, vulei nan ngeihnak ca (documents) le a tlintuk fawn ko ttung an ti. Cucaah Hakha vulei kong ahhin ziah a kan tawlrel piak duh hnga lo. A farnu Sayamah Far Ki vial cu a vulei i Taing-yin-si Zung an sak cuahmah lio mi hmanh ngolter in Mara biakinn hmun ah an va tthialter hna i Far Ki vulei cu an pek tthan ko. Chungkhar le mah khua mah tlang caah cun a ttuan khawh ngai ko ttung” tiah a tial.
Hakha sangthar Ekah 100 chung ah hin dum ngei an tampi. Hi hmun chung ah dum ngeimi lak ah Sayama Far Ki hi Register tling tein ngeimi a si. Cozah nih hmun kan samh lai tiah an ti caah lam an cawh. Cozah nih Cozah quarter zong an sak. Asinain dum ngeitu vialte kha an dum ngeihning bit kauh he aa tlak in inn hmun pakhat, a cheu inn hmun pahnih tiin cozah nih an pek ve hna.
Sayama Far Ki hmun hnih an pek mi zong cu Taing-yin-si Zung ah halnak tuah hmasa lo in an sak piak ko. Cu tikah Sayamah Far Ki cu innhmun license tling te a ngeih caah Cozah nih Taing-yin-si Zung sak loin a dang ah an sak. Mara Biak inn ah an sak mi zong amah Cozah nih a tha an tinak ah an sak mi a si. Sayamah Far Ki nih ram kaupi a ngeih mi cu a herh ning in cozah nih an lak hnu ah hmun hnih te an pek.
Cu an pek mi cu Taing-yin-si Zung sak nak ah theihnak tuah loin sak an timh mi a si. Asinain license tling tein a ngeih caah ram ngei pawl cu innhmun an pek cio ko hna. Pi Za Tlem tu hmunhnih an pek ve nain a duh lo. Hmun 7 theng theng nan ka pek lo tiah Cozah cu a buai peng hna. Ziah a dang ram ngei vial nih an cohlan ko i amah lawng nih a cohlan khawh hnga lo. Khuapi pakhat sersiamnak thinlung a ngeih lo caah a si.
Sayamah Far Ki hmun khi Vice President nih a pek mi a si lo. Vice President nih mah hoih in riantuan a duh bal lo. Hihi cu Chin ram cozah nawl ngeihnak tang ah a ummi a si. Cun amah Sayamah Far Ki covo te khi a si. Hmun kaupi a pek hna caah hmun hnih cu cozah nih an pek ve mi a si.
Pi Za Tlem nih atu bantuk ca a tialmi hi zeidang tinhmi ngaingai um loin NLD sunghnak le Vice President sunghnak ding lam a kawlmi a si. Nutling pi, MP hna tuan cang mi nih hi bantuk thinlung he politic tuah cu ningzak ngaingai a si. Hi bantuk politic cu mipi nih zumh piak khawh a si hrimhrim lo. Politic thiam lo mi nihcun pumpak soisel le a si lo ning lih bak in Party le minung an doh.
Biahalnak;
- Ziah ram na ngeihnak cahren pawl a tlng ko le a dik mi a si ko ahcun na sungh thiam?
- ziah dum ngei pawl zong hmun hnih/hmunkhat cio an pek hna i khua thanchonak ca a si ko ahcun an ti i an cohlan ko bu ah nang vial na cohlan duh lo? hihi Hakha thancho na duh lo hna a si maw?
- Na vawlei hi a dih lak in an inchut lo, an in pek mi na lung tlin lo caah na cohlan duh lo a si?
- Kawl bawi ka ton na ti mi hna hi ram kong ah tuanvo ngeitu an si maw?
- Upadi lonh in inn theih le ramchuh ti mi ah zei upadi dah an lonh, upadi a lonh bak na ti khawh ko ah ziah na tei hna lo?
- Hi ca na tial mi tlangpi zoh tik ah na Party campaign caah na tuah mi a si. ziah Vice President hna hrokhrol thil tuah na puh? Vice President hi a rak in dawtu dawh a si, atu ahcun ziah ral ah ser na timh?
Credit: Rolian
Leave a Reply