Nihin October 8, 2020 ni ah kan farnu Sui Hlei Tial ruak fimtawlnak kong he pehtlaih in Myone Covid-19 Response Committee le Khua nu Khua pa le TYA , Pastor te le Thantlang Siang Hleirun Chungkhar hna he Ton biaruahnak an ngei tiah theih a si.
Cu tonbiaruahnak ah Khuanu Khuapa aiawh in Thantlang sipin president Pu Ram Khar nih biachimhnak a ngei. Cu kong he pehtlaih in Pu Ram Khar nih a tanglei bantukin a facebook ah video he hmanthlak he a tarlangh.
“Nihin 8.10.2020 meeting ka chim mi: A Tu lio Thantlang khua nih kan ton mi , Malaysia ah a kan thih tak mi Kan Nau nu Sui Hlei Tial kong he Pehtlai in Myone Covid-19 Response Committee le Khua nu Khua pa le TYA , Pastor te le Thantlang Siang Hleirun Chungkhar hna he Ton biaruah nak ah Khua Nu Khua Pa Aiawh in ka chim mi si” tiah a tial chih hi a si.
Pu Ram Khar nih a chimhmi nan ngaih hlan ah tonnak an ngeihmi kong he pehtlaihin fiang deuh in kan theih khawhnak hnga Thantlang Youth Associations nih an tarmi a tanglei ah kan thilpiak chih hna.
PU RAM KHAR BIACHIMHNAK hi hmeh law a aw ngai khawh a si.
Kan farnu Sui Hlei Tial ruak tawlrelnak he pehtlai in pehzulh fianternak
2020 October 08, zinglei 09:00-11:00 ah Thantlang penguk zung ah cozah zunglei nawlngeitu, khua nu/pa le TYA/TSC upa tonbiaruahnak kan ngei. A biapi in kan lungfah, ngaihchiatnak le biakhiahnak ngeitu Covid-19 main committee ah khuami le zatlang phu telh le ruahnak hal ding ah chimhruah a si.
2020 October 08, zanlei 1:00- 4:00 ah Chin ramkulh cozah in Vuanci Pu Soe Htet, Upadi Choh Pu Sonny Thang Cung, Chin ramkulh uknak zung bawizik, Palik bawizik le khua nu/pa, biaknak lei, ngaihchiatnak tong mi chungkhar le TYA/TSC kan i tel. Tonnak a dih hnu ah Ramkulh cozah le TYA/TSC lawng tel in tonnak ngeih ding in hal a si i a dih hnu ah kanmah le Cozah upa lawng zalong tein kan i tong.
Chin ramkulh cozah sin ah kan hal mi cu:
1. Hi kongkau ah mizapi lei teltumnak in a zalong mi hlathlai phu (Independent Inquiry Commission) dirh i hmuhchuah mi fianhnak le dantatnak ngeih ding
2. Peng huap Covid-19 Committee ah khuami teltumnak ngei ding in remhsiam ding
3. Hihnu hmailei ah hi bantuk a um lo nakding le Covid-19 zulhphung he aa tlak in aho mithi zong nih thlaan hmunte ah an i vui khawh nakhnga tawlrelpiak ding
Hi a cunglei kan hal mi kong ah Chin ramkulh cozah nih ruahpiak ding le Statement siseh, thawngfianhnak tuahpiak ding in lehnak an kan ngeih. Crd:TYA.
Leave a Reply