Hakha Nawi tiva le fingletlang cu ka rak tlawnlennak le vahvaihnak a si caah ka mit thlam in ka chinchiah. University Sianginn le Golf Club hmunhma pawng a si chih tikah Pathian sersiam cia nawi vakuan hrawn le fingletlang cu a dawh hringhran dah.
Kum 1998-99 cawngtaa puaiṭaw (Student Festival) lio ah Halkha sangkip din ti ngah khawhnak dingle Timit ngakhur cu Nawi tiva in Ti pek khawhnak dingah Budget rak pek asi i rak tuah a si.
Rianṭuantu khinh mi hna cu Deputy Director Tun Aung Lwin, Major San Yu, U Than Shwe le Salai Ṭial Sang hi ṭuanvo khinh kan rak si hna. U Than Shwe (SAE) le keimah nih a hramthawk in Serve kan tah i a dongh tiang ṭuanvo ngei bik mi kan rak si. Ralkap nih kan kal umnak ṭuanvo an rak kan lak peng.
Nawi tiva cu Ti-hnah hram a ṭhami a umlo caah Feb, March, April, thla chung ahcun Ti-mit ngakhur ti pek khawhnak dingin kan rak tuahmi cu Nawi tiva a luangmi a fate caah Ti-mit ngakhur ti peknak kan rak tuahmi cu 10% hman hi kan tlam a rak tling lo. Ti-mit Ngakhur hmanh ti a pe kho lomi Nawi tiva in Tidil khamh itimh cu van rua surter thiamnak hna kan ngei ahcun phundang, ka thluak nih a phan lo.
Hakha hmunhma vawlei hi tah a fek maw kan ti ahcun kum 1997 lio ah Buchok lam in Siizung lam pialnak tlang vialte siseh, kum 2015 lio ah Rungtlang Pyidawta, Halkha khuahlun a rak cim dih. Halkha kan vawlei hi a fekmi vawlei a silo caah Halkha khua pawng Tidil tuah hi cu kan tuahlo ah aṭha tiah ka ruah.
Nawi tiva a luannak a hrampi hna khi kan zoh ahcun Halkha dawrthar le Cawbuk khuasa an eidin hang, khengṭawlnak le thil suknak hang in a luangmi a si. Phundang in kan chim rih ahcun Fadeuva, Sacuanva, Khahrualva, Lungthava ah hmunthur kan hlonhnak tiva Furcan ah an luang i ṭhalcan ah a luang tilo mi tiva cek sawhsawh an si hna.
Chin ram cu furcan ahcun kan tappi le kan lungthu tang chungin Ti a luangmi a lo, minung kalnak ṭhalo in a kan tuah ṭhan, kan lam le kan sul vialte a hrawh dih ṭhan.
Nawi dam kan kham ahcun fur can ah pehzulh in ni 3-4 rua a sur ah siseh, kan vawlei hi a fekmi asilo caah Li a hnin ahcun Nawi dam hi a boh lai i Timit hmun dawh pi vialte khi a hrawh dih lai, minung caah ṭihnung ral a si.
Thal can ah Tih-nah aumlo mi tidil tuah in, a reu ṭhan dingmi tuah, Furcan ah ṭihnung ding asi mi Nawi dam khamh itimh hi cu sullam aumlo mi rianṭuannak a si tiah ka ruah.
Nawi dam dilnak zon khi Hakha khuathar, dawrthar, Cawbuk in CCU tiang a tlai dihmi a si caah Halkha khuasa khua nu khua pa nih biatak tein kan Halkha himnak caah kan doh ding asi tiah ka ruah.
Credit: Tialsang Bawitlung
Leave a Reply