Kahdaih hnatlaknak minthut NCA kum 8 tlin camtuak ah Chin National League For Democracy(CNLD) Chairman hlun Pu Zo Zam a kai ve, tiah theih a si. Anih hi 2015 kum NCA min rak thut hram thawk lio CNF nih min an rak thut lioah a rak i tel ve mi a si. Asinain CNF nih cun Rammi a thattu le rammi cung ah sualnak ṭha lo a tuahtu SAC ruangah NCA hnatlaknak le cahren vialte cu a rawk cang tiin October 12 ah KNU le ABSDF he phungning tein an rak langhter cang nain Min Aung Hlaing nih NCA kum 8 tlin camtuak ah ceihmai dingin a kawh, tiah Zalen nih a ṭial.
Communist Party nih miphun zalennak ca ah tiin an aupi ruang tu ah tlangcung hriamtlai a thawhkehnak a si i ralkap huatnak men ruangah tlangcung hriamtlai atu tiang an um lo, tiah Min Aung Hlaing nih a rak chim bal. NCA min thutmi hnu a zul i SAC he ceihmainak a ngeimi phu hna hi ALP, DKBA, KNU/KNLA-PC, PNLO le RCSS an si i annih hi NCA kum 8 tlin camtuak zong ah a kaimi an si. CNLD Chairman hlun Pu Zo Zam cu NCA kum 8 tlin camtuak a kainak kong he pehtlai in CNLD party nih cathanh an chuahmi le an langhter mi a um rih lo.crd- The Chin Post.
Thawng dang: Chin Mi Pakhat Sinin Champhai Peng Ah Rithaisi Tamlak Assam Rifle Nih An Tlaih Ṭhan. October 13 ah Zokhawthar, Champhai pengkomh ah Myanmar mi (Chin mi) pakhat sinin rithaisii methamphetamine tam lak Assam rifle nih an tlaih. Assam rifle nih rithaisii phorh a si kong thawngpang an theih mi cu pehzulh in hlathlainak an ngei i, Chin mi Kam Biak Tuang, Haimual khua sinin Methamphetamine 15 kg in a rit mi an tlaih. Rithaisii hi India phaisa in nuai 4500 man hrawng ah ruahdamh a si.
Assam rifle nih Kam Biak Tuang cu phungning tein dantat ding ah Champhai palik sakhan ah an ap. A luancia October ni 3 ah khan Chin nu Lalremtluangi sin in Lengpui vanlawng bual ah Methamphetamine 10.4 Kg an rak tlaih i, October ni 4 ah Chin mi ṭhiamṭhiam Ropianga, Khuamawi sinin Methamphetamine 11.6 Kg an rak tlaih cang. Atu October thla chung lawng ah Myammar lei in Mizoram ah rithaisii tam lak a luh kong Mizoram tualchung news ah hmuh khawh a si. October 13 i an tlaih mi he October thlachung lawng ah Methamphetamine Kg 37 cu Myanmar mi sinin Assam rifle le Mizoram palik nih an tlaih cang.
Leave a Reply