Tukum thimnak kongah ka lungum bia: Keimah cu ramkhel kong a hngalmi ka silo nain hruaitu le hruaimi kong cu a tuaktan zungzal mi pakhat ka si. Tutan thimnak kongah keimah ka lung um bia chimnak hmunhma keimah tein kai pe. Kahin ka lung ummi taktak ka chim. 2015 lio ahkhan NLD nak a tha deuhmi party dang ka rak hmu lo. Ralkap uknak tang um kha ka rak duh lo taktak caah a si kho men.
NLD party nih kum 5 deng an kal cianak chungah ka lung cu a tling lo ngai. Thutdan thutzia maw an thiam hnga lo silo le kan rak pekmi hna thutdan cu dah a rak rawk ciami a si hnga. Mipi hmuh khawh dih dingah hawi zalttuang thut lio ah thutdan sang ah thutter an si ko nain, zapi nih hmuh le chawn khawh an har hringhran. Achel ah thlichia hran bang kan i relrem lo karah an kan phan tawn.
NLD cu rampi caah a tha bik party a si kho men nain kan Chin ram ca ahcun anmah nakin kan caah a tha deuhmi thim ding lam dang kan ngei. Cucu ka innpa nak cun ka chungkhar nih ka herhmi le ka duhmi an theih bik lai tihi a si. Kan duhmi an thei lo chinchap, chimnak caan le hmunhma kan ngei lo chinchap. Kan sunghmi a tlawm lai lo mu.
Laitlang khuate ah a chuak i za ah za nuhrin covo pakhatnak ah a chiami ram ah khua a sami pakhat nih ka duh bikmi cu ka kal tak ciami laitlang um ka dawtmi hna nih hruaitu tha an hmuh i an nunchung caan tawite ah nuhrin covo kan ti lengmang mi an covo i an hmuh, an tep ve ding hi ka duh ngaingai mi a si.
Cucu tutan ah mino tampi nih an i zuamnak ka hmuh tikah kaa lawm ngaingai. Ka phanmi pakhat cu Chin mino tampi nih caan tampi le thazaang tampi dihin tha kan pek hna i kan ti khawh zat chuahin kan ttanpi mi party hi kum 2015 lio rampi thimnak bantuk hna a si sual hnga maw tihi ka thin a phangmi a si.
Hruaitu tha nih hruaimi he zeitik hmanah ai hlat lai lo bantukin a hruaimi minung cung zongah thleidannak a ngei lai lo. A hruaimi minung cu mifim he fim lo he, hngakchia he upa he, cun chimkho he chimkho lo he an si lai caah anmah le sining hoih in a chawnbiak kho i an herhmi cio tlinhter kha a duh bikmi le ai zuam hmasa bikmi a si zungzal awk a si tihi ka pom ning a si.
Tongkhong a niam deuh caah a sang deuhmi Mawra kan pek hnanak hi mi zapi kan sining le kan herhmi a kan hmu dih khotu si hna sehlaw kan tlam a tling deuh lai tihi a si. Mawra cu thutnak a si, na kai ahcun an khiahpi lo hmanah a rawk lai. Cucaah thutdan hman zia a thiammi Hruaitu tha hmuh hram ko usih tihi ka thlacamnak a si.
(25 October 2020, Ni Par Hlawnceu, Stavanger, Norway)
Credit: niparh
Leave a Reply