NLD Angki Naa Hruk Tiin An Vuak

Chin Ramkulh, Falam khua ah SAC Ralkap nih nihin July 1 zinglei ah “NLD angki naa hruk” ti in, Thluaklei tlamtling lo mi Aa Ek cu an velh tiah theih a si. Nihin zingka ah SAC Ralkap nih Falam khua luhka Pura pawng in chekhlatnak an tuah i cu lio ah cun Aa Ek cu an vuak tiah tualchung mi pakhat nih a chim.crd-TCP

Thawng dang -SAC nih uknak an laak hnu in Myanmar ram ah pumtlamtling lo in a thi mi ngakchia 382 an um cang i, ngakchia 1400 tluk thong an tla, tiah UN ah nuhrin covo lei tuanvo ngeitu Tom Andrews nih June 29 ah a chim. Rulh awk ṭha lo tiang in harnak a tuartu mino hna he zong i hmuhtonnak kan ngei, tiah Switzerland ram Geneva ah tuah mi UN Human Right Council meeting ah Myanmar ram boruak he pehtlai in a chim.

Uknak laak hnu ah SAC ralkap nih zaangfahnak ngei lo in ngakchia an tlaih hna i, thah an si nak kong ah SAC lutlaitu hna cu ṭuanvo an ngei, tiah Tom Andrews nih cun a langhter. Ngakchia hna cu an tukvelh hna i, a phunphun in an hrem hna. Cheukhat cu kuakci in a tak ah an nawn chih hna i, an kutke, an ha le an tin zong an phawi hna. Cupinah nu ngakchia hna cu tlaihhrem an tong tiah a langhter.

Cu bantuk tharum thawhnak pinah, raikhamsii i chunh lo ruangah ngakchia 33,000 cu an nunnak ca ah thinphang ngai a si i, ngakchia sang 5 fai cu emargency in bawmh an herh, tiah a chim fawn. UN Special Rapporteur Tom Andrews nih a chimmi cu NUG cozah zong nih a cohlan i, Myanmar ngakchia hna bawmhchanhnak pe cio ding in nawlpatnak zong an tuah.crd-TCP

ca dang- Paletwa ah ralkap anmah le anmah an i kap, AA he kahdohnak a um lo: Khine Thukha, 2022 June 28 – Chin ramkulh, Paletwa peng, Youkchaungwa khuapawng, June 27 ah Myanmar ralkap le Arakan Army (AA) karlak ah kahdohnak chuah loin SAC ralkap anmah le anmah kha AA ralkap ruat sual in zinglei sml 11:00am hrawng ah an i kah caah a thimi an um tiah AA biachimnak nawl a ngeitu Khine Thukha nih Western News ah a chim.

Kahdohnak a chuak lo. Kanmah he kahdohnak a chuakmi a si lo. SAC ralkap nih anmah le anmah an i kah sualmi a si. Anmah le anmah ṭihnak in an khah ruangah mi palh sual in an i kapmi a si. A thimi zong an um tiah kan theih”. SAC ralkap anmah le anmah an i kah sual ruangah khatlei le khatlei hriamngan in sml cheu hrawng an i kap tiah AA biachimnak nawl a ngeitu Khine Thukha nih a peh.

Paletwa peng, Youkchaungwa khua pawnghrawng ah SAC ralkap nih hmunhma an khuar i anmah le anmah an i kap sualmi a si ko lai tiah Abaungtha khua i himnak hmun ah a ummi khuami pakhat nih Western News ah a chim. “A hramthok cun meithal in an i kap. Cun, hriamngan nih a zulh. Caan sau ngai an i kap.

SAC le AA karlak kahdohnak ah kan ruah. A si lo. SAC ralkap anmah le anmah an i kapmi a si” tiah a chim. A luancia May 26 ah Abaungtha khuapawng ah SAC le AA karlak ah sml 2 chung hrawng kahdohnak a rak chuak i Abaungtha khuabawi le innhra ukbawi cu SAC ralkap nih an rak tlaih hna.

Cun, May 30 zinglei sml 10 hrawngah Abaungtha khuami zapi ngawt in Supauk tlang ah an tlaih/velh hna hnu ah khuami cheukhat an thlah ṭhan i khuami a cheu hrawng cu SAC nih LIB 289 ah an rak hren hna. A rak luat ṭhanmi khuami hna cu SAC ralkap nih khuachung ah hmunhma an khuar ruangah khuachung um ngam ti loin an zaam tiah theih a si.crd- The Chinland Post.

Leave a Reply

Your email address will not be published.