Nihin cu The Hakha Times nih Hakha Thantlang Pyine hluttaw Candidates pawl biaraldohnak a tuahpiak hna. Cu chungah NLD Candidate pakhat hmanh an i tel lo caah biaraldohnak zohtu mipi nih hruaitu Pu Pa Pui cu fianternak tuah ding in an hal. Cu ti cun Pu Pa Pui nih NLD candidates pawl an itel ve khawhlonak thil sining cu a tanglei bantukin fianternak a tuah.
Hmasa kan chim cang bangin tutan biaral dohnak ahhin Hakha Thantlang ah a ummi Party dihlak, Myone Party lutlai dihlak phone ka chawn dih hna. Thawng kan thanh dih hna. Zaangfah tein nan Candidates pawl kan chim piak uh kan ti dih hna. Cun anmah Candidates pawl vialte zong phone kan chawnh dih hna. Ca kan kuat dih hna. Cun NLD lei kap zong hi an zung Hakha Thantlang kan chawnh ko hna.
Asinabeltein an kan let ning ahcun cunglei nih direct in hi bantuk debate le interview te pawl ahhin nanmah nih direct in fawi tukin nan cohlan hna lai lo tiah an kan ti ti si. Cun Hakha in Candidate pakhat nih cun hi hi cu kan tuah awk a si, nan kan tuahpiakmi hi kanmah ca zong ah a tha. Zapi ca zongah a tha. Kei cu ka cohlan, asinabeltein, cunglei ah ka van chimh lai i a ngah si ahcun kei cu tel ka duh a kan ti.
Asinain Candidate pakhat nih cun cunglei Center (Baho) nih nan rak i tel lo ah a tha tiah an kan ti caah tutan hi kan i tel kho lai lo e tiah tu zing ahkhan a kan ti. Le tutan ah kanmah zong kan lung a that lo ngaimi cu zapi nan caah kan Candidate dihlak an mui hmu dih hna u ti kan duh hringhran. Kanmah lei kap zong nih a si khawh chung in kan i zuam.
Cun NLD lei in Candidate zong nih pumpak in tel a duhmi an um hrimhrim ti kan hngalh. Asinabeltein Myone party le cunglei ah nawl an hal tikah nawl an ngah lo caah tutan ahhin telh a duh ko nain aa tel kho lomi zong an um caah zaangfah tein a rak kan hlamtu, NLD tha a petu zong nan si ah, cun a dang nan si zongah rak kan ruah thiam hram uh ti kha zaangfah kan van in nawl hna.
A cunglei bantukin biaraldohnak hruaitu Pu Pa Pui nih fianternak a tuah hi a si. A hnuah nihin biaral dohnak ah aa tel khomi minung 5 hna cu NLD candidates pawl an i tel khawhlonak kong he pehtlaih in an ruahnak a hal than hna i an panga ning tein an hmuhning an chim ve. Cu chungah USDP candidate Dr. Hmuh Thang le CNLD candidate Pi Chin Chin Pekthang an hmuhning kan van tarlangh piak hna.
Chin Chin Pekthang (CNLD Thantlang peng, Pine No 1 Candidate) hmuh ning;
A taktak ti ahcun ramdang zong kan va zoh dih tikah, ramkhel, ithimnak ding timi, a tu caan te hi aho paoh ram caah a biapi ngaimi caan a si. I kan chim pengmi kha a si ko. Tu bantuk i a biapi tuk mi caan hmanh i an itel khawh lomi hi cu kan chim na hra in, cunglei i siannak a um lomi a si tikah, a poi taktak. Cunglei lawng te i halnak nawlnak tuah ding cun zeitindah miphun caah an kan dirpi khawh lai.
Miphun le ram caah kan dirpitu ding an si ahcun hi tu ni bantuk ah an itel ve i an tlaihtleng zeidah si, miphun le ram caah zeidah kan i timh timi kha chim ve ding an si ko. Natein kei ka hmuh hna ning ahcun kannih miphun le ram caah kan ti i covo kan ti lio ah hi bantuk dir hmun hi cu zapi nih zeibantuk thla an si tihi a ruah awk kan thiam cang ko lai dah tiah chim ka duh. Kai lawm.
Dr. Hmung Thang (USDP Thantlang peng, Pine No. 2 Candidate) Hmuh ning;
A tawinak in kan chim ah cun a fiang ko cu teh. Baho program in an hmang timi a fiang ko cu teh. Zeica tiah cun Federal in kan kal si ahcun Baho sisin in rawnh lo ding asi. Kannih party cu Baho sisin in kan kal lo caah luat tein kan um ko. Annih Party cu Federal kha an thinlung ah um ti loin, Baho sisin in a cunglei uknak kha, a cunglei lamhruainak kha an zulhmi a si ti kha a fiang ko le Baho sisin in a hmangmi an si caah an rak chuak lo a si ko. zeica tiahcun Federal le pungsan ti cu aa kaih bak lo ka ti cang kha mu. Annih cu Baho sisin in a hmang caah an i tellomi a si e tiah ka van chim duhmi a si.
Mipi nan hmuh ning a tanglei ah comment pek ve khawh a si.
Leave a Reply