2023 Nobel Peace Prize ca ah thimmi cazin 5 lakah Myanmar ram aiawhtu Kyaw Moe Htun le NUCC an i tel ve, tiah theih a si. PRIO director Henrik Urdal nih, nuhrin covo lei cawlcangtu hna min cazin 5 cu nizan Febuary 1 ah a langhter, tiah kan theih. Nobel Peace Prize pek ding ca i aa telmi minung 5 cu “Iran Journalist Narges Mohammadi le Afghanistan Journalist Mahbouba Seraj,
Kyaw Moe Htun le NUCC, ICJ, Philipine rammi Victoria Tauli-Corpuz le Ecuador rammi Juan Carlos Jintiach, Nuhrin Covo Checkhlatnak tuahtu phu” hna an si, tiah theih a si. Thimmi 5 langhternak an tuah hi SAC nih nawlngeihnak an laak kum 2 tlin camtuak he aa tong, tiah kan theih. Kyaw Moe Htun cu SAC ralkap an sualnak le nuhrin covo an buarnak vialte vawleicung nih an hmuh khawh le an theih khawhnak ding UN ah chimphuannak a tuah lengmangtu a si.
NUCC cu thimnak ah aiawhtu palai, tlangcung hriamtlai phu, political party, strike committee, zatlang bu hna le bu dangdang tampi he sermi a si, tiah theih a si. crd- The Chin Post. Thawng dang: Wetlet Peng Khua A Khangtu SAC Ralkap Kah An Ton Caah 6 An Thi. Sagaing ramṭhen, Wetlet peng khuate a khangtu SAC ralkap pawl cu Febuary 1 zing sml 9:00AM ah kah an ton caah 6 an thi tiah theih a si.
Makyitone khua a khangtu SAC ralkap 50 hrawng nih, tualchung mi an thilri mansung an firpiak hna i, Pinzin khua lei an kal lioah PDF phu 2 nih lamhruang in kan kah hna, tiah People’s Serveant Revolution-Wetlet in ṭuanvo ngeitu pakhat nih a chim. “Minutes 30 leng kahdohnak a chuak i SAC ralkap 6 hrawng an thi. Drone in ngiatthlainak kan tuah hna tikah SAC ralkap ruak zong hmuh khawh a si.
Kan Drone tu cu SAC ralkap nih an kan kah thlakpiak,” tiah a chim chap. Cu kahdohnak ah Wetlet peng PDF le People’s Serveant Revolution-Wetlet phu hna i bawm in an kah hna i anmah lei in a thimi le aa hliammi an um lo, tiah theih a si. Cu SAC ralkap hna nih a luancia January 23 thawk in Makyitone, Pinzin le Mukyi khua telh in khuate 6 an rak khangh caah inn 1,000 leng a rak ciam, tiah theih a si.crd-the chin post.
Thawng dang: SAC Nih An Nawlngeihnak Thla 6 An Chap! A Zalongmi thimnak tuah a si khawh nakhnga caan laak rih a hau ti in, “Emergency period” cu 2023 February 1 in a ra lai mi thla 6 tiang sauhpiak ding ah January 31 i tuahmi Defence and Security Council meeting ah SAC Chairman Min Aung Hlaing nih nawlnak a tuah i, chungtel hna zong nih an cohlan, tiah theih a si. Rampi hruainak i sermi phunghrampi 419 ning in ‘Chief of defence’ sin ah rampi nawlngeihnak cu,
Pek a si tiah an meeting ah cun biakhiahnak an tuah. Thimnak kong he pehtlai in mizapi sin ah fimchimhnak ngeih a herh i cu hlan bantuk in lam le sul pehtlaih a fawinak ding ah caan pek a herh rih, tiah SAC Chairman nih cun tonbiaruahnak ah a chim. Vote pek le pek lo kong cu mizapi duhthimnak a si i, thimnak tuah a si khawh nakhnga cozah cu kan i zuam ko, tiah SAC hruaitu Min Aung Hlaing nih cun a chim, tiah RFA nih a ṭial.crd- The Chin Post.
Leave a Reply