Kawlram chung ah thawngpang tete kan theihmi hi nikhat hnu nikhat in a chia chin lengmang ko. Tu lio cu Covid zawtnak a kar lio le cu zawtnak in a thimi an um cuahmah lio zong ah mah tein a nunnak aa lakmi zong an um ve hoi.
Nihin October 2, 2020 ni, zinglei suimilam 10:30am hrawngah Yangon ramthen, Shwepyithar myone, Zikung khua No. (24) sang, Yangon ramthen innpauhsu kanbaungpat lam, Inn number 441 ah a ummi Ko Naing Soe le Ma Aye Thidar te an fanu, pasal a ngei cangmi kum 20 minu Ma Nguh War cu an inn ihnak khan chungah hri awk in a nunnak a liam tiah theih a si.
Mah Nguh War hri awknak kong he pehtlaih a ruang le thil sining fiang tein langhter chihmi a um rih lo pinah zeibantuk buaibainak dah a ngei timi zong zeihmanh langhter chihmi a um rih lo. Hi thihnak kong he pehtlaih in tuanvo ngeitu hna nih zeitindah an fimtawl i zeitindah hma an lapi timi zong theih a si rih lo. Hi thawngpang hi SH media nih tarlanghmi a si.
Kan hnu September 29, 2020 ni zongah minu pakhat hri awk in a nunnak aa lak ve. Cucu Thanhlin myoma Taung Zawtika lam ah a ummi a si ti zong in theih a si.
Source nih cu minu min le hri awknak tiang a phanpitu a buaibainak kong zeihmanh langhter chihmi a um ve lo. A hmanthlak le a khua min le hri awk in a thi ti tiang lawng in a tarlangh hi a si. Hi kong hi Ko Than Win nih a tarlanghmi aa si.
Leave a Reply