American ram thlanglei Tennessee ramkulh Nashville ah a ummi tualleng sianginn pakhat ah nu pakhat nih meithal a kah hna caah ngakchia 3 telh in 6 an nunnak a liam tiah theih a si. March ni 27, zinglei ah rifle 2 le kutser meithal pakhat aa tlaihmi kum 28 tluk nu pakhat nih sianginn ah kalhnawh in ngakchia le upa tiin 6 a kah hna. Meithal aa tlaih i mithah lailawnnak a tuahtu nu hi Nashville khuasa a si, tutan i a kal hnawhnak sianginn zong ah ca a rak cawngmi siangngakchia hlun a si.
Mithah lainawnnak a tuahtu nu cu a thil tuahnak hmun lila ah palik nih an kah ve caah a thi. Zeiruang ah atu bantukin lainawnnak a tuah ti cu hlathlai cuahmah lio a si. Tutan thil a cannak tualleng sianginn hi Nashville khua thlanglei kilometres 9 tluk a hlatnak ah a um i, mipi an umnak hmunhma zong a si tiah theih a si. Cu sianginn ah cun tualleng in taang 6 tiang siangngakchia 200 tluk ca an cawnnak sianginn a si tiah palik nih an chim.
Meithal i tlaih in hramhram thilsual tuahnak a karh chin caah, sianginn hna hi ṭha deuh in kan runven a herh” tiah America president Joe Biden nih a chim.crd-the chin post. Thawng dang: Tamwe Ah Leilawng Check-nak A Tuahtu SAC Ralkap Hna Cu Mizei Phu Ti Theih Lomi Nih Bomb In An Cheh Hna. Yangon, Tamwe peng ah leilawng chekhlatnak a tuahtu SAC ralkap le Traffic Police hna cu bomb chehhnawh in doh an tong tiah tualchung mi nih an chim.
Nihin March ni 28, zinglei suimilam 10:30AM hrawng Myinpyaine Kwin lampi ah chekhlatnak a tuahtu SAC ralkap le an kuttang ummi Traffic Police hna cu doh an ton caah SAC ralkap lei in minung 2 an i hliam tiah mit hmutu hna nih an chim. Traffic Police 4 le SAC ralkap 1 cu Khon hleidonh ah kutcheh bomb in cheh an ton caah Traffic Police 2 cu an thisen he mizaw phurtu leilawng nih a rak don hna” tiah cu thil a can lio mit hmutu pakhat nih a chim.
Lampi ningcang deuh loin kan palsual zong ah a tlawm bik thong kul an kan liamter, Traffic Police hna cu SAC he i fonh in rian an ṭuan” tiah Yangon khuachung ummi pakhat nih a chim. Atu hnu ah cun Yangon khuachung hmunkip ah Traffic Police nih hramhram in mipi sin ah phaisa an hal tawn caah, atu bantuk thil an ton hi a ṭhami a si ko tiah a chimchap. SAC ralkap le Traffic Police bomb cheh an tonnak kong ah mizei phu nih an tuahmi a si fiang tein theih a si rih lo.crd-the chin post.
Leave a Reply