NUG Nih Hitin A Thanh Cang Hih

Natthankwin Khuapi Kan Uk Khawh Cang Tiah NUG Nih Thanh, Bago ramṭhen, Kyaukkyi peng Natthankwin khuapi SAC ralkap sakhan cu tualchung hriamtlai ṭangṭi phu nih an kah i an laak hnu ah Natthankwin khuapi a ningpi in kan uk khawh cang, tiah National Unity Government (NUG) nih nihin December 28 ah an thanh. Natthankwin khuapi kahdohnak ah SAC ralkap pawl nih vanlawng le hriamngan he an bawmh ko hna nain tualchung hriamtlai ṭangṭi phu nih khuapi cu an laak i a ningpi in an uk khawh ṭhiam.

Cun, hmunram thianhfelnak zong an tuah colh, tiah theih a si. Natthankwin khuapi chung kahdohnak a fah ruang ah kaphnih in thi le hliam an um pin ah ngakchia telh in tualchung mi chung in thi le hliam an tam ngai i a zat belte an fehter kho rih lo. Cu kahdohnak ah cun Karen National Liberation Army (KNLA), PDF, All Burma Students’ Democratic Front (ABSDF) le Bamar People’s Liberation Army (BPLA) hna i fonh in an ṭangṭi.

Bago ramṭhen nichuahlei kahdohnak kong he pehtlai in RFA nih an khawmhsuat khawhmi chung in a luancia November 1 in December 15 tiang ah tualchung mi 26 an thi i minung 71 hliam an pu. Thawng dang relchap- Calvary Baptish Church Mino Nih Hakha Thongtla Mi Hna Rawl An Hrawmh Hna, Chinram khuapi Hakha thonginn ah thong a tlami hna cu Calvary Baptish Church Mino Bu nih zanriah an hrawmh hna, tiah theih a si.

Hakha thonginn ah a ummi kan unau hna cu nihin December 27 zanlei zanriah kan hrawmh khawh hna. Christmas hlan ah zanriah hrawmh kan rak timh cang ko hna nain caan relrem lonak a um caah nihin lawng ah kan hrawmh khawh hna hi a si,” tiah thongtla zanriah hrawmhnak ah ṭuanvo ngeitu he naihniam in a ummi pakhat nih The Chin Post ah a chim. December thla cu Bawipa Jesuh chuah thla a si bantuk in ngaihchiahnak le har a tongmi hna sinah zanriah hrawmh dingin timhtuahnak kan rak ngei. Kan i timhmi tlam a tlin khawh ca zong ah kan i lawm ngaingai, tiah a chim chap.

Nihin thongtla zanriah a hrawmhtu Calvary Baptish Church Mino hna nih an Biakinn ah rawl an chuan i thongtla mi pawl cu zanriah an va hrawmh hna. Hakha thong chung ah a ummi hi nu nakin pa an tam deuh, an dihlak ah 60-70 kar hrawng an si. Calvary Baptish Church Mino nih thongtla zanriah an va hrawmh hna ah thongtla lawng si loin thonginn rianṭuantu hna zong an hrawmh hna, tiah theih a si.

Thongtla mi hna zoh tik hna ah an muihmai tete cu a panhmi an lo ko nain an inntuar ning le an lung li a lennak mithmai hmuh khawh an si. Cun, khua a kih ngai cang caah kuthrolh lum, angki le tawhrolh hna zong an herh ngaingai,” tiah a cunglei ṭuanvo ngeitu nih cun a chim. Thongtla mi hi Hakha khuapi um Khrihfabu kip cio nih an zohkhenh cio ko hna lai. Chungkhar nih nifatin te rawl chanh hi a har taktak.

Hi hnu hmailei zong ah Khrihfabu kip nih i zuam rih ko hna usi. Khrihfabu lawng si loin mino hawikom a bu in a ummi hna le pumpululh chuih khat hawikom tibantuk zong in thongtla hna hi rawl kan hrawmh khawh tawn hna ah cun a ṭha tuk lai, tiah a chim chap.

Leave a Comment

Leave a Reply

Your email address will not be published. Required fields are marked *