NUHMEI NGAKTAH CAAH KASADUHTHAH MI RAM: Chinram lak ah a lai bikcem ram cu Surngen ram a si. Chinram nih aa ngeihmi ram lak ah Bawipatlang meng 70 saumi nitlaklei ah a um mi ram a si. Chinram nitlak ram le nichuah ram ah a laicer tupi tlang a si i a min hmanh ah BAWIPA tlang tiin minsak mi tlang dawh tak tak a si.
Cucaah ram dang mifim mi hna nih ke lamh in an rak zoh mi ram a si. Vawleicung va lak ah va man fak bik a um an ti i vawlei saram zohtu mifim hna nih an rak hmuhnak ram a si. Chinram lak ah santlai thahnem bik tlang dawh ah a tel ve mi a si.
BAWIPA thimpiak mi ram a si. Thial khawh zong a si lo. Chin ram a hngaktu Chin miphun zawn a ruah bik tu tlang a si. Cucaah Ka saduh ka thah mi ram a si ka ti cang bantuk in 2010 kum May 10 Tisen khua mi he Bawipatlang nichuah ram Senthang peng khua mi Dongva khua tlawn ah kan i thawh.
Kum 2000 May 3 rd ni ah U Hram Sang Hakha a inn ah kan rak i ruah mi Bawipatlang lam cu lam uu cawng kawl ah Dongva khua tiang ka va phaknak a si. A ka kalpi tu hna Tisen khua upabik ah Rev. Chan Hnin LABC GS i a pa a si. Kan phak zan ah caan kan ngei ti lo caah zing sml 7 ah caan tawi meeting kan ngei kho.
Rawl ei khawh in cam awk caan ka ngei ti lo caah Dongva mi chim cah ning in Bawinuva kan tan i Zathal khua kan riah. An khua ram kan zoh dih hnu ah an khuabawi pa kan va tawn i bia ruahnak ka ngei. Zathal ah Pastor a tuan mi Buanlung khua Surngen Sayakyi Za Hoe a nupi a tapa sin kan i thum. Amah a um lo i a fapa tu nih a kan zoh khenh i kan hna a ngam ngai.
Zathal in Hakha lei Motorcycle Ks. 15000/ Tangka ka cham bau deuh i a ka zulh tu ka naupa Tisen khuabawi Pu Thla Thang fapa tu nih a ka pek piak. Cozah tih ah a kan luhpi ngam lo i ke in saupi kan kal. Cawbuk Pu Zo Hmung an inn ah ka thum. Pu Chan Pum he zong a tawn bal lo mi biaruah i tawnnak caan tha ka ngei.
Hakha kan phak zan ah Pu Hrang Vung (Dongva) khua nu khua pa a auh hna i zingka Meeting kan ngei kho. Kan Meeting ah Rev. Di Van le Khuahrang Pu Za Kio telpi ve in Caan tha kan ngei. Biachim caan le a dongh thlacam nak keimah nih ka ngeih. Tar hna a rak rami hna ab lung thin kha ka philh kho hrim lo. Hi vawlei duhtling lonak ram tarnu tarpa hna Pu Hre Lian Kio cathlah bang par bang an uai dih cang ko lai ka ti. Kan meeting tel hna Pu Za Kio le Rev. Di Van hna hlam awk an tha ti lo.
Kan Meeting biachah bantuk in Tisen le Dongva kar a veikhatnak MP nih Motorcyle hun puai an kan tuah piak kho. Ruah lopi in Thantlang MP hruai tu hna sin in Bawipatlang tuupi lam ser lo ding in Tamadah tiang report a si. Lautu ram le Senthang ram ri meng 12 tluk te lawng a naih mi lam cu MP caan hnih tiang a kong ceih a um kho ti lo.
Lai phungthluk ah Saduhthah al chia timi a um. Lam le sul kong ah pengkhat le pengkhat khuakhat le khuakhat i theih thiam lonak ruang ah kan Bawipa tlang Nitlak ram lam hi kum 60 leng kan i rauh pi cang. Aibur kar le Tisen B kar lam ruang ah ni hin kan tawn mi hna hi Chin miphun kan lungput theihpar a si ko. A caan ah cun lung rawk ngai kan si.
MP thim lai ah cun Chin miphun lungrual ding tlang au cio a si. MP i cuh hlan kan lungthin le i cuh hnu kan ruahnak le kan lungthin a lawh ti lo. Chin ram caah siaherh lem lo MP thim lai lawng ah ramrian I tuan ter duh pawl an tampi lai ka zum. Ram rian cu nun caan chung kan Chin ram kan siaherh le kan dawt zungzal ding cu kan tuahsernak kan nunnak ah a langh awk a si.
Ram sertu siloin ram rawk hrawhtu ah i can sual a fawi te cang. Kan Bawipatlang meng 100 pawng kam ram vialte hi Chin Lairam pumpi caah Pathian thimpiak mi ram asi. Salm 47:4 ah kan hmuh. Cucaah cun Chin unau dihlak nih kan Chin ram Nuhmei ngaktah kingro ti mi hna an tuanbia kan zoh tikah a dawh tuk.
Biaknak le kan pa hna le ram hruainak lei kan pa kan timi hna hi Chung khartling lomi hna mitthli he khuasa mi inn chungkhar hna an si ko. Kan Pathian BAWIPA a tha tuk. Pa ngeilo Nu ngeilo hna nih Pathian thluachuah an co cang timi Tuanbia ah hmuh hngalh khawh a si. Cucaah Surngen Bawipatlang nitlak ram le chaklei thlanglei peh tlaihnak lam ti le mei hna nih hin kan Chinram a kan cawm caan a ra te lai. Lungsau tein thlacamnak in hngak cio ko uh si.
Mi kan bochan hi mualphonak a rak si. BAWIPA Jesuh bochan hi kan himnak a si. SURNGEN RAM SIAHERHNAK CAAH Ka saduhthah chunmang a si. Kan Chin miphun Pathian nih kan umnak ka cio ah kan umpi sehlaw a thluachuah he kan zohkhenh cio ko seh ti ka thlacam bu in. Pu HupThang(09-409109082 ).
Credit: Hup Thawng
Leave a Reply