Zanmang ah phanah thar ngeih ahcun nungak tlangval ngeihnak asi an ti tawn. A hman le hmanlo cu nangmah pumpak nih na hngalh ko khah. Mah hi a hman maw hmanlo tinak nak in phanah thengmang hi nungak tlangval sining he tahchunh a sinak kong tu hi ruat hmanh. Phanah cu aa hruk ding pumpak nih kan i tah i kanmah ke he aa rupmi lawng kan i danh tawn. Mah he aa kaih lomi phanah kan i cawk sual i khirh than a ngah ti lo ahcun mah ti khan hruk loin man ngei lo khi a si ko.
Phanah phun aa style bak nain sau a nguhlo phun aa style lemlo nain caan sau a nguh phun Number size tiin a um. Aa style bakmi kan duh i kan i tah lio ah kan i rem bantuk asi nain vun i danh taktak tikah a mui lawng aa dawh i lam kan kal tikah sia a remlomi phanah cu caan sau danh khawh asi tawn lo. Cu bantukin nungak tlangval zong hi a muidawh le lenglei sinak lawng zoh in a sining taktak zeihmanh rak hngalh lo ahcun um ti tikah caan sau an nguh ve lo.
Aa style lemlo nain danh tikah kan ke sia a rem tukmi cu a tteh tiang hmanh kan i danh ko. Cu ve bantukin a lenglei muisam le sining zohah zei huaha lo a lo nain um ti tikah sining i hngalhthiam ahcun chanchung an hmun ko. Number hrimhrim cu a biapi tuk. Kanmah ke nakin a ngan deuh tukmi le a hme tukmi hrim cu kan thim bal lo. Nungak tlangval dirhmun in nangmah nakin a let in a sang deuhmi asiloah a niam tukmi naa thim ahcun na chanchung ngaihchiat lungfahnak na in ko lai.
Phanah i tah tikah a poi ngaimi cu duhnung phun te a um i cucu kan i tah lio ah a hme pahmi asiloah tlompal te a ngan pahmi pawl cu caan sau kaa hruk ahcun kaa zaa te men ko lai ka sia a rem te ko men lai timi ruahchannak he kan cawk ahcun kanmah size ngaingai asi lo caah kan i hruk taktak tikah harnak tampi kan tong kho. Zeitin tiah a hme pahmi cu a kan reh tikah kan ke a dul ko a fak kho. A ngan pahmi cu kan kal tikah orhlei kehlei a duhnak poah ah a choi ve. Lamhla pi denh awkah a si kho lo.
Cucaah phanah aa danh lomi minung kan um lo caah a sining cu kan i fian cia a si ko. Nungak tlangval hrim nihcun phanah naa thim tikah na duhdan na hngalhfian bantuk tein nungak tlangval na ngeih tikah a pakhatnak ah mah Size te thim thiam ding hi a biapi tuk. Phanah cu caan khat ca te lawng asi. A tteh ahcun a dang cawk than khawh asi. Asinain nupi le va cu nunchung ca an si caah thim naa palh citcet ahcun thlen le a thar cawk than phun zong a si lo caah na nunchung cu harnak le buainak in a khat ko lai. Cucaah aa style mi lawng na duh ahcun aa style nak a loh tikah na loh cu na tlau a si ko lai i aa style lemlo zongah nangmah he aa rupmi te naa thim thiam ahcun na nunchung nun hnangam te in na um ve ko lai. Credit by Pi Sui Len Tial.
Leave a Reply