Operation 1027 Cu Biatak Tein Aa Thawk Than Cang Lai

2024 Chung Ah SAC Uknak A Hram In Kan Bongh Cang Lai Tiah Chaklei Ṭangṭi Phu Thum Nih An Thanh, SAC uknak cu kum khat chung ah a hram in kan bongh cang lai, tiah chaklei hriamtlai ṭangṭi phu thum nih nizan February 9 ah an thanh. Chaklei hriamtlai ṭangṭi phu thum nih, Tuluk kum thar chung ah hramhram uknak cu a hram in kan bongh lai, tiah an langhter. February 10, 2024 in January 25, 2025 tiang hi Tuluk miphun hna nih Dragon kum tiin an auh mi a si i hi kum chung ah hin SAC uknak cu a hram in kan bongh cang lai, tiah an thanh.

Atu kar hi Shan ramkulh chaklei ah SAC ralkap le chaklei hriamtlai ṭangṭi phu thum kar kahdaihnak an tuah lio a si nain kaphnih in ralkap thazaang an chap caah a rauh hlan kahdohnak a chuah ṭhan an zumh kong tualchung mi hna nih an chim. Operation 1027 aa thawk hnu ah Tuluk hruainak in chaklei hriamtlai ṭangṭi phu thum le SAC ralkap cu kahdaihnak an tuah nain Chaklei hriamtlai phu chungtel a si mi AA le SAC cu Rakhine ramkulh ah fak ngai in an i kap cuahmah.

Thawng dang relchap- Kawlin Khuapi Chung Ah SAC Ralkap An Lut Ṭhan! NUG kuttang ah a um cang mi Kawlin khuapi ah SAC ralkap nih vanlawng in kahdohnak an tuah pin ah ralkap tampi cu February 8 ah Kawlin khuapi ah an lut, tiah February 8 zan ah Kawlin Revolution(KR) nih an thanh. SAC ralkap pawl cu kan kham hna i khuapi tiang an phan cang tiin thawng kan theih nain thawng fiang a si rih lo, tiah NUG chimphuannak nawlngeitu Kyaw Zaw nih RFA ah a chim.

Kawlin khuapi an sungh lo nakding ah NUG kuttang runvennak zung No. 1 kuttang nih an tawlrel i runvennak kong ah fiang tein chim awk a ṭha rih lo, tiah a chim chap. SAC ralkap pawl cu Kawlin khuapi la ṭhan dingin hmai an nor cuahmah ko nain PDF nih faak piin an kham ve hna caah SAC ralkap cheukhat hnu a kir mi zong an um, tiah PDF lei nih an chim.

Kawlin khuapi ah kahdohnak a chuah ṭhan ruangah tualchung mi hna cu ralhrial in an zaam hna. Cu kong he pehtlai in RFA nih Sagaing ramṭhen SAC chimphuannak nawlngeitu Sai Naing Naing Kyaw cu phone in pehtliahnak an tuah ko nain a cohlang lo. Kawlin khuapi cu 2023 November 6 ah KIA le PDF nih an rak laak i December 3 thawk in Kawlin khuapi chung ah NUG tang ukhruainak kalpi a si.

Leave a Comment

Leave a Reply

Your email address will not be published. Required fields are marked *