Operation 1027 Ruangah Myanmar Rampi Aa Ṭhencheu Kho, Chaklei hriamtlai ṭangṭi phu thum nih opertion 1027 an thawk ruangah Myanmar rampi aa ṭhencheu kho. Cu ruangah atutan buainak hi ṭha tein tawlrel ding in le SAC ralkap bawm cio dingin November 8 ah tuahmi National Defense And Security Council ah SAC President Myint Shwe nih a chim. SAC ralbawizik Min Aung Hlaing nih cun Shan ramkulh chaklei kahdohnak ah MNDAA nih Laukkaing hmunram laak an i tim i TNLA nih Palong ramkulh laak an i tim.
Chinshwehaw khuapi zong MNDAA le TNLA ralkap tam tuk nih an kah caah an laak. Myanmar le Tuluk ram petlaihnak ah harnak a chuak khomi a si, tiah a chim. 2021 February 1 thawk in President Win Myint, Aung San Suu Kyi telh in thimnak ah teinak a hmumi, Hluttaw palai leng ah NLD palai hna zong SAC nih an tlaih hna. National Defense And Security Council cu SAC caan karlak President Myint Shwe, Vice President Henry Van Ṭhio, ralbawizik Min Aung Hlaing, ralbawizik chang Soe Win, Pyituh Hluttaw Chairman Ti Khun Myat le SAC lutlai pali nih an dirhmi a si.
Thawng dang relchap- TNLA Nih Shan Mino Hruaitu Pakhat An Tlaih Ruang Ah SSPP Nih An Kah Hna, Shan ramkulh Muse peng Selanh khuami Shan mino hruaitu Sai Maung On cu Ta’ang hriamtlai phu TNLA nih an tlaih ruang ah Shan State Progress Party(SSPP) nih an kah hna, tiah theih a si. Nizan November 8 ah SSPP nih Ta’ang hriamtlai phu TNLA cu an kah hna i kaphnih kar fak ngaiin kahdohnak a chuak. Cu kahdohnak ah cun minung 10 an thi i 4 hliam an pu, tiah TNLA nih cathanh an chuah.
SSPP le TNLA kaphnih kar buainak a karh lo nakding ah tiin nizan November 8 ah Sai Maung On cu TNLA nih kan thlah ṭhan i kan kirter cang, tiah Ta’ang hriamtlai phu TNLA nih cun cathanh an chuah i buainak a zual nakhnga lo kaphnih hruaitu upa tonnak ngeih an i tim, atu dirhmun ah cun ṭangṭi phu zung nih kaphnih in pehtlaihnak tuah in an tawlrel lai, tiah TNLA nih an cathanh chuahmi ah cun an langhter.
Muse peng le Namkham peng pehtlaihnak lampi cu TNLA nih ṭuanvo an laak i Maiset, Phaichaung, Manpha khua sakhan hna cu SSPP nih November 6 zinglei ah voi thum, chun ah voi 5 tiin hnahnawhnak pe in hman an thlak hna, TNLA nih ralrin an pek hna nain November 7 zinglei ah SSPP hruaitu Sai Maung On cu a ra ṭhan i sakhan chung cu hman a thlak, tiah TNLA nih an thanh.
Bia fiang theih khawh nakding ah TNLA nih Sai Maung On cu chikhat ca ah an tlaih i biahalnak an tuah lioah SSPP hruaitu Sai Lin le a naule nih an va fuh hna i an kah hna caah kaphnih kar kahdohnak fak ngaiin a chuak i kaphnih hriamtlai phu in minung 10 an thih pinah 4 hliam an tuar, tiah TNLA lei nih an thanh.
Leave a Reply