Paletwa Peng Ah SAC Ralkap Nih Vanlawng In Bomb An Thlak I Tualchung Mi 7 Nunnak A Liam

Chinram, Paletwa peng, Dai hmunram, Huam khua ah SAC ralkap nih vanlawng in bomb an thlak ruangah tualchung mi 7 an nunnak a liam i inn zeimawzat an rawk, tiah tualchung mi hna nih an chim. Nizan January 29 zanlei suimilam 1:00 hrawngah SAC ralkap nih Huam khua ah hin bomb voi 3 an thlak, tiah theih a si. “Zanlei suimilam 1:00 hrawngah SAC ralkap nih bomb an thlak. 2023 December 19 lio zong ah bomb an rak thlak cang.

SAC ralkap nih bomb an rak thlak ruangah khua mi cheukhat cu ralhrial in an zaam i a kir cang mi zong an um,” tiah tualchung mi pakhat nih Khit Thit Media ah a chim. Huam khua SAC ralkap nih bomb thlaknak ah nunnak a liam mi tualchung mi hna konglam cu hlathlainak an tuah cuahmah lio a si i mi zeidah an si ti hngalh a si rih lo. Thawng dang relchap- PNLA Le Ṭangṭi Phu Nih Hsihseng Khuapi Khah-Mah-Yah 423 SAC Ralkap Sakhan An Laak Chap.

Shan ramkulh thlanglei, Hsihseng khuapi chung Khah-Mah-Yah 424 SAC ralkap sakhan cu Pa-O National Liberation Army (PNLA) le ṭangṭi phu nih an laak hnu ah Khah-Mah-Yah 423 SAC ralkap sakhan zong an laak chap i, hriamnam an laak mi le sakhan an laak mi kong cu phungning tein thanh a si te lai, tiah PNLA thawng laaknak hrampi nih Khit Thit Media ah an chim. A luancia January 26 ni ah Hsihseng khuapi Khah-Mah-Yah 424 SAC ralkap sakhan cu PNLA le ṭangṭi phu nih a rak laak i hriamnam zeimawzat zong an laak khawh.

Cu pin ah, nizan January 28 ah Hsihseng khuapi chung Khah-Mah-Yah 423 SAC ralkap sakhan an laak chap i hriamnam an laak mi kong zong phungning tein thanh an timh, tiah theih a si. “Hsihseng khuapi Khah-Mah-Yah 423 SAC ralkap sakhan cu January 28 zinglei ah a ningpi in kan laak khawh cang. SAC ralkap nih nizan chun nitlak vanlawng in bomb an thlak pin ah hriamngan dongcat lo in an kah.

Khah-Mah-Yah 423 SAC ralkap sakhan laaknak kong zong a rauh hlan ah kan thanh zau lai,” tiah PNLA thawng laaknak hrampi nih an chim. Ram pumpi kahdaih hnatlaknak NCA min a thu mi PNLA nih hramhram in nawlngeihnak a latu SAC ralkap pawl cu ṭangṭi phu unau hna he kan kahdoh ve cang hna lai, tiah a luancia January 26 ni ah phungning tein an thanh.

Leave a Comment

Leave a Reply

Your email address will not be published. Required fields are marked *