Paletwa Peng Um SAC Sakhan 2 Cu Rakhine Ralkap AA Nih An Laak Chap

Chin ramkulh, Paletwa peng ah SAC ralhrang nih umhmun an khuarnak Hkan-khah sakhan cu Rakhine ralkap AA nih tlamtlingte in an laak khawh pinah hriamnam tam ngai zong an laak chih khawh, tiah nitlaklei unau thum hna nih nizan January 13 zan ah thawng an thanh. Cu pinah Paletwa-Kyauktaw ramri ah ummi Meewa SAC sakhan zong January 13, zan suimilam 6:00 tluk ah an laak khawh chap i Paletwa peng chung um SAC ralhrang sakhan 20nak tlawm lo cu Rakhine ralkap AA nih an laak khawh cang, tiah an langhter.

SAC ralhrang nih umhmun an khuarnak Meewa sakhan cu 2024, January 1 in kahdoh hram kan thok cang i nizan January 13 ah tlamtlingte in kan laak khawh. Cu sakhan laaknak ah kan laak chihmi hriamnam pawl zong kan langhter te lai, tiah Rakhine ralkap AA nih thawng an thanh. Meewa sakhan laak kahdohnak lio ah SAC ralhrang nih cunglei kahdohnak a tuahmi ruang ah tualchung mi 1 nunnak a liam i inn tam ngai zong a rawk, tiah nitlaklei unau thum nih cathanh an chuahmi ah an langhter chih.

Thawng dang relchap- Kalaymyo Khuapi Um SAC Hriamngan Kahnak In Kum 12 Ngakchia 1 Nunnak Liam, Taingen Khua Um SAC Sakhan An Kah, Sagaing ramṭhen, Kalaymyo khuapi chaklei, Gyoegyarkwin khua ah SAC ralhrang nih nihin January 13 zing ah an kahmi hriamngan kuan puahkehnak in tualchung mi kum 12 ngakchia 1 nunnak a liam, tiah tualchung mi hna sin in kan theih.

Kalaymyo khuapi in meng 10 tluk aa hlatnak Gyoegyarkwin khua ah SAC ralhrang nih an kahmi hriamngan kuan a tla i kum 12 ngakchia nu 1 cu a paw ah a puah hnawh caah hliamhma faak a tuar i zing suimulam 11:30 tluk ah a nunnak a liam hi a si” tiah tualchungmi pakhat nih a chim. Chin ramkulh, Tedim peng, Kalay-Tedim lamcung um Taingen khua ah SAC ralhrang nih umhmun an khuarnak sakhan cu nihin January 13 zing ah Chin ralkap ṭangṭi phu hna nih an kahdoh i Kalaymyo khuapi hrambunh.

SAC ralhrang pawl nih hriamngan in an kah bawmh hna, tiah theih a si. Atu bantuk in SAC ralhrang nih hriamngan an kahbawmh mi ruang ah Gyoegyarkwin khua um kum 12 ngakchia 1 nunnak a liam, tiah kan theih. Atu zong pehtlai in hriamngan puahkehnak a chuak rih caah Gyoegyarkwin khua le a pawngkam khuate cheukhat cu vawlei khur an cawhmi chung ah an lut hna i mi cheu cu a himnak hmun ah an zaam hna, tiah theih chih a si.

Leave a Comment

Leave a Reply

Your email address will not be published. Required fields are marked *