Paletwa Pengchung Mi Hna Nih AA Sin Ah Ngunkhuai An Pek

Chin ramkulh, Paletwa peng ah India ram, Mizoram ramkulh in a lut mi eidin thilri pawl cu AA sin ah ngunkhuai pek a si, tiah tualchung mi hna sin in theih a si. Paletwa peng kahdohnak ruangah Rakhine ramkulh le a dang peng kip i pehtlaihnak lam pawl cu kham dih a si i tualchung mi hna nih Mizoram in facang, chiti, cite ti bantuk eidin pawl cu an cawk hna i AA sin ah zatuak 3(3%) ngunkhuai an pek, tiah theih a si.

A hlan ah cun Rakhine ram in eidin tete a rak lut tawn nain atu cu kahdohnak a chuah tikah eidin zong a lut kho ti lo i Mizoram ah kan cawk cang. Eidin tete kan cawk mi zong AA sin ah ngunkhuai kan pek, tiah tualchung mi pakhat nih a chim. Paletwa khua mi hna cu rianáš­uan ding an ngeih ti lo caah tangka luhnak zong a um huaha ti lo i atu bantuk in ngunkhuai an pek tikah an lungre a thei ngai, tiah an chim.

Paletwa peng AA le SAC ralkap kar kahdohnak ruang ah tualchung mi hna cu ralhrial in an zaam hna. Ralhrial tam deuh cu atu tiang an innlo an hlam ngam rih lo, tiah theih a si. Thawng dang relchap- Minbya Khuapi Kahdohnak Ah SAC Ralkap 60 Leng Arakan Army (AA) Sin Ah An I Ap , Rakhine ramkulh, Minbya khuapi kahdohnak ah SAC ralkap 60 leng cu nihin February 6 zinglei ah Rakhine ralkap AA sin ah an i ap i motor pathum in an kalpi hna, tiah Minbya khuapi tualchung mi hna nih an chim.

Minbya hrambunh SAC ralkap Khah-Mah-Yah 380 Battalion cu a luancia January 28 ni ah Rakhine ralkap AA nih an rak laak cang i Minbya ah a taang rih mi Khah-Mah-Yah 379 le Khah-Mah-Yah 541 sakhan cu AA nih pehzulh in an kah, tiah theih a si. SAC ralkap nih umhmun an khuarnak Minbya hrambunh 379 le 541 sakhan cu nihin February 6 zinglei ah AA nih an laak tiah thawngpang a leng nain fehternak a um rih lo.

SAC ralkap le AA kar kahdohnak a fah ruang ah Minbya khuapi le Mrauk-U khuapi ah nizan February 5 zinglei suimilam 9:30 hrawng in SAC ralkap nih raltuknak vanlawng Jet Fighter le Helicopter in voi 30 hrawng bomb an thlak, tiah tualchung mi nih an chim.

Leave a Comment

Leave a Reply

Your email address will not be published. Required fields are marked *